Rafiq Aslanov: "Azərbaycanda ötən il milyard kubmetrlərlə su itkiyə gedib"

Hazırda Azərbaycanda 1 milyon 431 min hektar torpaq sahəsi suvarılır, bu ərazilərin 610 min hektarı kollektor-drenaj şəbəkəsi ilə təchiz olunub.

Oxu.Az "Report"a istinadla xəbər verir ki, bunu Dövlət Su Ehtiyatları Agentliyi yanında Suların İstifadəsinə və Mühafizəsinə Dövlət Nəzarəti Xidmətinin rəisi Rafiq Aslanov Milli Məclisin Aqrar siyasət komitəsində "Aqrar sektorda sahibkarlığa dəstək: nəticələr və perspektivlər" mövzusunda keçirilən ictimai dinləmədə deyib.

Onun sözlərinə görə, aqrar sahənin inkişafı əsasən suvarma əkinçiliyinə əsaslanır və kənd təsərrüfatı məhsullarının böyük hissəsi bu sahələrdən əldə olunur.

"2024-cü ildə bütün suvarma mənbələrindən ümumilikdə 9 milyard 256 milyon kubmetr su götürülüb, bunun 6 milyard 710 milyon kubmetri təsərrüfatlara verilib. Təxminən 2 milyard 500 milyon kubmetrə yaxın su isə itkiyə gedib. Suvarılan ərazilərin 56%-i (790 min hektar) öz axını ilə, 642 min hektarı isə mexaniki üsulla əldə olunan su ilə təmin edilir".

R.Aslanov bildirib ki, suvarma planlaması məqsədilə magistral kanallar üzrə su istifadəsi, rayonlararası su bölgüsü və su limitləri müəyyən edilir:

"Vegetasiya dövründə suvarmaların səmərəli aparılması üçün ərazilərə mütəxəssislər təhkim edilir, mövcud çətinliklər mütəmadi olaraq aidiyyəti qurumların iştirakı ilə müzakirə olunur və operativ tədbirlər görülür. Daxili çayların su axını bölgələr üzrə qeyri-bərabər paylandığından və axının əsas hissəsi yaz aylarına düşdüyündən, bu suların yalnız 10-15%-i vegetasiya dövründə istifadə olunur, qalan hissəsi isə dənizə axıdılır".

Xidmət rəisi əlavə edib ki, son illərdə su ehtiyatlarının səmərəli istifadəsi məqsədilə genişmiqyaslı layihələr həyata keçirilib:

"Ümumi tutumu 557 milyon kubmetr olan 5 su anbarı tikilib, 500 su anbarı (31 milyon kubmetr tutumlu) təmir olunub. 4 800 km suvarma kanalı və 3 610 km kollektor-drenaj şəbəkəsi yenidən qurulub. Samur-Abşeron suvarma sistemi, Taxtakörpü-Ceyranbatan, Neftçala magistral kanalı və digər iri layihələr həyata keçirilib".