Şabran şəhəri, Heydər Əliyev prospektində yerləşən Qurtuluş parkının işıqlandırma sisteminin yenilənməsi cari il üzrə Şabran bələdiyyəsinin tədbirlər planına daxil edilib.
Bu barədə Oxu.Az-ın sorğusuna cavab olaraq Şabran Rayon İcra Hakimiyyətindən bildirilib.
Qeyd olunub ki, yararsız vəziyyətə düşmüş köhnə işıq dirəkləri artıq sökülərək ərazidən götürülüb.
"Müasir işıqlandırma sisteminin və yeni işıq dirəklərinin qısa müddətdə quraşdırılması nəzərdə tutulur. Görüləcək işlər nəticəsində Qurtuluş parkında axşam saatlarında da sakinlərin təhlükəsiz və rahat istirahəti üçün əlverişli şərait yaradılacaq", - məlumatda bildirilib.
Sakinlər Şabran şəhərindəki Qurtuluş parkının vəziyyətindən narazılıq edirlər.
Oxu.Az-a müraciət edən şəhər sakini bildirib ki, Heydər Əliyev prospektində yerləşən park uzun müddətdir baxımsız vəziyyətdədir.
Onun sözlərinə görə, ərazidə işıqlandırma sistemi işləmir, dirəklər sökülərək kənara yığılıb. Sakin deyir ki, parkda axşam saatlarında qaranlıq hökm sürdüyündən insanların, xüsusilə uşaqların və yaşlıların istirahəti çətinləşib.
Müraciətdə həmçinin qeyd olunur ki, parkın suvarma sistemi də yararsız vəziyyətdədir, fəvvarə illərdir fəaliyyət göstərmir. Şikayətçi yaxınlıqdakı stadionun da baxımsız qaldığını və uzun müddətdir hər hansı bərpa və ya yenidənqurma işlərinin aparılmadığını iddia edib.
Məsələ ilə bağlı aidiyyəti quruma sorğu ünvanlanıb.
