Bakının Xətai rayonu, Nəcəfqulu Rəfiyev küçəsində səkinin dağıdılmasından sakinlər şikayətçi olublar.
Oxu.Az xəbər verir ki, bu barədə sosial şəbəkələrdə paylaşım edilib.
Qeyd olunub ki, N.Rəfiyev, 29 ünvanında yeni tikilmiş binanın həyətində açılan obyekt sahibi səkini qanunsuz olaraq parkinqə çevirmək istəyir.
"Maşınlar insanların hərəkətinə mane olur, xüsusilə böyüklərə və uşaq arabası ilə gedənlərə çətinlik yaradır. Biz icra hakimiyyətinə şikayət yazmışıq, "102" və "902"yə zəng etmişik, amma heç bir nəticə yoxdur. Onlar səki yerinə yol salmaq istəyirlər", - deyə şikayətdə bildirilib.
Məsələ ilə bağlı Xətai Rayon İcra Hakimiyyətindən Oxu.Az-ın sorğusuna cavab olaraq bildirilib ki, artıq məsələ həllini tapıb.
"Ötən gün sözügedən ünvanda belə bir cəhd olub. Daxil olan məlumat əsasında icra hakimiyyəti tərəfindən məsələyə müdaxilə olunub və bu cəhdin qarşısı alınıb. Ərazi əvvəlki formasına qaytarılıb", - deyə məlumatda vurğulanıb.
Əzizə İsmayılova
