Təhsil Nazirliyinin lisenziya müddətinin uzadılması barədə qərar çıxardığı Azərbaycan İctimai-Siyasi Universitetinin tələbələri bu gün aksiya keçirməyə cəhd ediblər.
Oxu.Az xəbər verir ki, tələbələrin ANS PRESS-ə verdikləri məlumata görə, Azərbaycan İctimai-Siyasi Universiteti bağlandıqdan sonra onlar Təfəkkür Universitetinə köçürülüblər. Təfəkkür Universitetində isə həmin köçürülən tələbələrdən Təhsil Nazirliyinin müəyyən etdiyindən daha yüksək illik ödəniş haqqı tələb ediblər:
“Təhsil Nazirliyi bəyan etdi ki, biz hər hansı universitetə köçürüləndən sonra da əvvəl ödədiyimiz təhsil haqqını ödəyəcəyik. Amma biz Azərbaycan İctimai-Siyasi Universitetində oxuduğumuz zaman 1900 manat illik ödəniş ödəyirdik. İndi isə Təfəkkür Universitetindən bizə 3 min manat ödəyəcəyimizi söyləyirlər. Bizim şikayətimizə niyə baxmırlar? Təhsil Nazirliyinə müraciət etmişik, amma müraciətlərimizə cavab verməyiblər”.
Tələbələrin şikayətini nəzərə alaraq Təhsil Nazirliyi ilə əlaqə saxladıq. Nazirliyin İctimaiyyətlə Əlaqələr Şöbəsinin rəhbəri Cəsarət Valehov ANS PRESS-ə açıqlamasında tələbələrin şikayətlərinin araşdırıldığını söyləyib. O, qeyd edib ki, Azərbaycan İctimai-Siyasi Universitetindən Təfəkkür Universitetinə köçürülən tələbələrin illik ödəniş haqları 2 min manatdan yüksək olmayacaq:
“Universitet rəhbərliyi ilə əlaqə saxladıq. Orada hər hansı bir aksiyanın keçirilməsindən söhbət belə gedə bilməz. Sadəcə olaraq Azərbaycan İctimai-Siyasi Universitetinin tələbələri ora qeydiyyatdan keçmək üçün yaxınlaşıblar. Azərbaycan İctimai-Siyasi Universitetində təhsil haqqı 2 min manat olub. Amma Təfəkkür və digər universitetlərdə ödəniş haqları 2 min manatdan yüksəkdir. Amma Azərbaycan İctimai-Siyasi Universitetindən Təfəkkür Universitetinə köçürülən tələbələrin ödəniş haqları 2 min manatdan yüksək olmayacaq. Ən yüksək hədd də 2 min manatdan yüksək olmayacaq. Amma vaxtı ilə Azərbaycan İctimai-Siyasi Universitetində tələbələrin ödəniş haqları 3 min manatdan yüksək olub”.
Qeyd edək ki, bir müddət öncə Təhsil Nazirliyi Azərbaycan İctimai-Siyasi Universitetinin fəaliyyətinə verilmiş lisenziyanın müddətinin uzadılmaması barədə qərar qəbul edib.
