Tibb işçilərinin sertifikasiyası: 2024-cü ildə 18 mindən çox mütəxəssis imtahan verib

2009-cu il tarixli Prezident fərmanının icrası çərçivəsində praktik tibb və əczaçılıq fəaliyyəti ilə məşğul olan mütəxəssislər beş ildə bir dəfə sertifikasiyaya cəlb olunurlar.

Oxu.Az-ın xəbərinə görə, Milli Məclisdə çıxış edən səhiyyə naziri Teymur Musayev nazirlik tərəfindən Milli Məclisin Səhiyyə Komitəsinə təqdim edilən "Praktik tibb və ya əczaçılıq fəaliyyəti ilə məşğul olan və ya bu fəaliyyətlə məşğul olmaq istəyən şəxslərin sertifikasiyası Qaydası"nda dəyişiklik layihəsinin müzakirəsi zamanı məlumat verib.

Nazir bildirib ki, 2024-cü ildə 18 502 tibb işçisi sertifikasiya imtahanında iştirak edib. 2025-ci ilin əvvəlinə olan məlumata görə, ölkədə ümumilikdə 92 896 tibb işçisi fəaliyyət göstərir. Onlardan 35 233 nəfəri həkim, 57 663 nəfəri isə orta tibb işçiləridir.

Bu ilin ilk dörd ayında isə 5 498 nəfər imtahanlara qatılıb və onların 91%-i ilk cəhddə müvəffəqiyyət qazanıb. Birinci cəhddə uğursuz olanların 95%-i ikinci imtahandan uğurla keçib.