Müəllimlərin tibbi kartla müayinədən keçməsi zamanı yaranan gecikmə narazılığa səbəb olub.
Oxu.Az xəbər verir ki, bununla bağlı sosial şəbəkədə müzakirə aparılıb.
Şikayətçi gecikdiyi üçün yenidən müayinəyə müraciət edərkən xəstəxanadan ona Gigiyena və Epidemiologiya Mərkəzinə (GEM) üz tutmalı olduğu bildirilib. Vətəndaşın sözlərinə görə, gecikməyə görə 100 manat məbləğində cərimə tətbiq olunacağı da deyilib.
"Gigiyena və Epidemiologiya Mərkəzinə getmək mütləqdir? Bu tələb hansı qaydalara əsaslanır və gecikməyə görə həqiqətən cərimə nəzərdə tutulur?", - deyə şikayətçi soruşub.
Oxu.Az-ın sorğusuna cavab olaraq Səhiyyə Nazirliyinin Mətbuat Xidmətindən bildirilib ki, müayinənin gecikməsi üçün hər hansı cərimə nəzərdə tutulmayıb:
"Azərbaycan Respublikası Səhiyyə Nazirliyi Kollegiyasının 13.12.2012-ci il tarixli 46 nömrəli Qərarına əsasən, təhsil işçiləri ilkin (işə qəbul olunarkən) və dövri (ildə bir dəfə) tibbi müayinədən keçməlidirlər. Dövri müayinə əvvəlki müayinənin keçirildiyi tarixdən etibarən növbəti ilin tamamınadək aparılmalıdır.
Beləliklə, işçinin əvvəlki tibbi müayinədən keçdiyi tarixdən bir il tamam olduqda növbəti müayinədən keçməsi tələb olunur. Müəyyən edilmiş müddət ərzində müayinə keçirilmədikdə isə həmin müayinə gecikmiş hesab edilə bilər.
Müayinənin gecikməsi halında cərimə məsələsinə gəlincə qeyd edək ki, bununla bağlı İnzibati Xətalar Məcəlləsində (İXM) 100 manat məbləğində inzibati cərimənin tətbiq edilməsi nəzərdə tutulmayıb".
Məlumatda bildirilib ki, GEM-ə müraciət etmək mütləq deyil:
"Yalnız tibbi müayinə kartının itməsi və ya istifadəyə yararsız vəziyyətə düşməsi barədə işçi kartı aldığı ərazi GEM-inə yazılı məlumat verir. Bu barədə məlumat sistemə daxil edildiyi zaman köhnə tibbi müayinə kartı bloklanır və yeni kart hazırlanaraq işçiyə təqdim edilir".
