Tovuz rayonunun Öysüzlü kəndində ərə verilən və müvafiq qurumlar tərəfindən toy mərasiminin qarşısı alınan qız təhsil aldığı dövrdə dərslərdən mütəmadi olaraq yayınıb.
Bu barədə Oxu.Az-ın sorğusuna cavab olaraq Qazax-Tovuz Regional Təhsil İdarəsindən bildirilib.
Qeyd edilib ki, 2011-ci il təvəllüdlü, Tovuz rayon sakini olan şagird Mahir Ələkbərov adına tam orta ümumtəhsil məktəbində təhsil aldığı dövrdə dərslərdən mütəmadi olaraq yayınıb. Bununla bağlı məktəb rəhbərliyi tərəfindən 23 yanvar 2023-cü il tarixində hüquq-mühafizə orqanlarına rəsmi müraciət edilib.
"Hüquq-mühafizə orqanlarından təhsil müəssisəsinə 13 fevral 2023-cü il tarixində daxil olan cavab məktubunda qeyd olunub ki, şagird ailəsi ilə birlikdə əvvəlki ünvanda yaşamır və onların paytaxtın Qaradağ rayonu Buta qəsəbəsində məskunlaşdıqları müəyyən edilib. Qeyd olunan tarixdən sonra isə şagirdin ailəsinin yeni ünvan üzrə hər hansı ümumtəhsil müəssisəsinə və ya müvafiq təhsil idarəsinə rəsmi müraciətinin olmadığı müəyyən edilib. Bu səbəbdən şagirdin təhsilini davam etdirməsinə nəzarəti təmin etmək mümkün olmayıb",- məlumatda bildirilib.
Tovuz rayonunun Öysüzlü kəndində ərə verilən və müvafiq qurumlar tərəfindən mərasimin qarşısı alınan qız danışıb.
Oxu.Az "Teleqraf"a istinadən xəbər verir ki, N.Əsgərova açıqlamasında toy mərasiminin keçirilmədiyini deyib:
"Sadəcə "Hə" mərasimi keçirilirdi. Toy və ya nişan olmayıb. Ailə quracağım bəylə dağda tanış olmuşdum. Anası-atası da bilirdi. "Hə" almağa gəlmişdilər, o da baş tutmadı".
N.Əsgərova oğlan evi tərəfdən cəmi beş-altı nəfərin gəldiyini deyib: "Qeyd elədiyim kimi, "hə" almağa gəlmişdilər, mərasim də bu münasibətlə keçirilirdi. Yaşım 18-ə çatanadək məni gözləyəcəkdilər. Yaşım tamam olduqdan sonra toyumuz olacaqdı".
N.Əsgərova həmçinin bildirib ki, təhsil almaq arzusu olub, amma imkansızlıqdan təhsilinə davam edə bilməyib:
"Mahir Ələkbərov adına Öysüzlü kənd tam orta məktəbində oxuyurdum. Altıncı sinifdən çıxmışam. Səbəb imkansızlıq oldu. Təzədən yenə məktəbə müraciət etdim, qəbul eləmədilər, dedilər, bu məktəbdə yer yoxdur".
Tovuz rayonunun Yuxarı Öysüzlü kəndində 2011-ci il təvəllüdlü qızın toy mərasiminin keçirilməsi ilə bağlı bəzi detallar məlum olub.
Oxu.Az "Teleqraf"a istinadən xəbər verir ki, 14 yaşlı qız altıncı sinifdən məktəbdən çıxıb. Qızın anası Elnarə Ələsgərovanın sözlərinə görə, onun məktəbdən çıxmasına səbəb maddi sıxıntı səbəbindən təhsil ala bilməməsidir.
Ananın sözlərinə görə, həmin gün toy mərasimi yox, "hə" mərasimi keçirilib: "Kafelərdən birində kiçik bir şənlik məclisi qurulub. Övladımı oxuda bilməmişəm, buna imkanımız olmadı".
Məlumat üçün qeyd edək ki, E.Ələsgərova ikinci dəfə ailə həyatı qurub.
Qeyd edək ki, məhkəmənin qərarı ilə bir ay müddətinə inzibati qaydada həbs edilən şəxs 1992-ci il təvəllüdlü bəy - Firdovsi Abbasovun atası Fizuli Abbasovdur.
Tovuzda 14 yaşlı qızına toy edən şəxs ögey atası olub.
Oxu.Az APA-ya istinadən xəbər verir ki, saxlanılan ögey ata ikinci ailəsindən olan qızına toy edən zaman polis əməkdaşları tərəfindən qarşısı alınıb.
Hazırda araşdırma aparılır.
Tovuz rayonunda 14 yaşlı qızın ərə verilməsi ilə bağlı bəzi detallar məlum olub.
Oxu.Az-ın məlumatına görə, 2011-ci il təvəllüdlü qızın ailə quracağı şəxs ondan 19 yaş böyük olub.
14 yaşlı qız valideynləri tərəfindən 1992-ci il təvəllüdlü oğlana ərə getməyə məcbur edilib.
Tovuz Rayon Polis Şöbəsinə rayonunun Yuxarı Öysüzlü kəndində 2011-ci il təvəllüdlü qızın toy mərasiminin keçirilməsi barədə məlumat daxil olub.
Daxili İşlər Nazirliyinin Gəncə regional qrupundan Oxu.Az-a verilən məlumata görə, polis əməkdaşları tərəfindən həmin mərasimin qarşısı alınıb və tərəflərin valideynləri ərazi üzrə polis orqanına dəvət olunublar.
Onlarla profilaktik söhbətlər aparılıb, qanunvericiliyin tələbləri izah edilib və barələrində inzibati protokol tərtib edilərək məhkəməyə göndərilib.
Məhkəmənin qərarı ilə valideynlərdən biri bir ay müddətinə inzibati qaydada həbs edilib.
Samir Əli
