"Büdcə sistemi haqqında" Qanunun yenilənməsinə ehtiyac var".
Oxu.Az xəbər verir ki, bu fikirləri Hesablama Palatasının sədri Vüqar Gülməmmədov parlamentdə "Azərbaycan Respublikasının 2027-ci il dövlət büdcəsi haqqında" qanun layihəsinin müzakirəsi zamanı bildirib.
O bildirib ki, bu sənədin müasir iqtisadi çağırışlara uyğunlaşması ilə bağlı Hesablama Palatası və ayrı-ayrı deputatlar tərəfindən mütəmadi olaraq təkliflər irəli sürülür:
"Qanunun Milli Məclis üçün önəmli olan maliyyə sənədlərinin təqdimat siyahısını tənzimləyən 12, 16, 18 və 20-ci maddələrinin də müasir rəqəmsal idarəetmə sürəti ilə uyğunlaşmasına ehtiyac var. Yenilənmək iqtisadi resursların daha səmərəli istifadəsini təmin etmək üçün vacibdir. Müasir dünya dövlət proqramlarının effektivliyini və dayanıqlığını inkişaf məqsədlərinə birbaşa qanunvericilikdə inteqrasiya edir. Ölkəmizdə bu sahədə islahatlar başlanılıb, lakin prosesin tam hüquqi status qazanması üçün qanunun fundamental şəkildə yenilənməsinə də zərurət duyulur. Hazırda büdcə münasibətləri fərqli hüquqi aktlarla tənzimlənir və praktikada bu aktlar arasında bəzən ziddiyyətlər də yaranır. Bu problemdən çıxış yolunu bütün büdcə prosesinin vahid hüquqi sənəddə təsbit edilməsindən, başqa sözlə, büdcənin məcəllələşməsində görürük".