"Müasir dövrdə urbanizasiya dünyada ən sürətli proseslərdən biridir".
Oxu.Az xəbər verir ki, bunu ekologiya və təbii sərvətlər nazirinin müavini Vüqar Kərimov WUF13 çərçivəsində Azərbaycan pavilyonunda keçirilən "Plastik çirklənmə ilə mübarizə: Yaşamaq üçün əlverişli şəhərlərin və dövri iqtisadiyyatın təşviqi" adlı tədbirdə deyib.
O bildirib ki, şəhər əhalisinin artması, istehlakın dəyişməsi və gündəlik istehlak dövriyyəsinin yüksəlməsi tullantıların həcminin artmasına təsir edir:
"Xüsusilə də birdəfəlik istifadə olunan məhsulların və qablaşdırılmış malların geniş yayılması tullantı problemini daha da dərinləşdirir. Urbanizasiya nəticəsində yaranan əsas problemlərdən biri plastik tullantıların düzgün idarə olunmamasıdır. Şəhərlərdə tullantıların həcmi artdıqca mövcud infrastruktur bir çox hallarda kifayət etmir. Nəticədə plastik tullantılar digər tullantılarla birlikdə toplanır, çaylara və dənizlərə axıdılır, torpağı çirkləndirir və canlılar aləminə zərərli təsir göstərir.
Bu səbəbdən davamlı və ekoloji təhlükəsiz şəhərlərin formalaşdırılması plastik tullantıların effektiv idarəolunmasından keçir".
Nazir müavini əlavə edib ki, problemin həlli üçün "smart" tullantı idarəçiliyi sistemlərinin tətbiqi, dövri iqtisadiyyatın təşviqi və yaşıl şəhər konsepsiyasının gücləndirilməsi çox vacibdir:
"Davamlı şəhər inkişafı yalnız ekoloji təhlükəsizlik və effektiv tullantı idarəçiliyi sistemləri ilə mümkündür. Bugünkü müzakirələrdə dünya ölkələrinin iqtisadiyyatından asılı olmayaraq üzləşdiyi əsas problemlərdən biri məişət tullantılarının idarəolunmasıdır. Ölkəmiz dinamik inkişaf edir, yeni istehsal müəssisələri yaradılır, insanların sağlamlığı və səhiyyə xidmətlərinə olan tələbat artır. Buna uyğun olaraq tullantıların həcmi də yüksəlir.
Son dövrlərdə ölkəmizdə məişət tullantılarının idarəolunması istiqamətində mühüm addımlar atılıb. İqtisadiyyatın müxtəlif sahələrində qəbul edilmiş qanunvericilik təkmilləşdirilib, müasir infrastruktur yaradılıb. Balaxanı poliqonunun müasir standartlara uyğun şəkildə yenidən qurulması, çeşidlənən tullantıların emalı və yeni poliqonların yaradılması nəticəsində bu sahədə mühüm dəyişikliklər müşahidə olunur.
Eyni zamanda, regionlarda və kənd yaşayış məntəqələrində tullantıların idarəolunması üçün aidiyyəti qurumlarla birgə işlər aparılır. Tullantıların təkrar emal müəssisələrinə yönləndirilməsi istiqamətində tədbirlər görülür. Dövlət-özəl tərəfdaşlığı platformasında da fəaliyyət genişləndirilir.
Plastik tullantıların düzgün idarə olunmaması kənd təsərrüfatına mənfi təsir göstərir, dəniz canlılarının məhv olmasına və insan sağlamlığı üçün ciddi təhlükələrin yaranmasına səbəb olur".
:640.jpg)
