"Bu gün Qəməri (Ay) təqviminin 9-cu günü islam dünyasında Ərafat günü kimi qeyd olunur. Dünyanın müxtəlif yerlərindən gələn milyondan çox zəvvar hazırda eyni adı daşıyan çöldə, Rəhmət dağının ətəklərində günorta namazını gözləyir".
Bu barədə Oxu.Az-a Qafqaz Müsəlmanları İdarəsinin (QMİ) Xarici əlaqələr şöbəsinin müdiri, Həcc elektron sisteminin rəhbəri Vüsal Cahangiri məlumat verib.
QMİ rəsmisinin sözlərinə görə, günorta namazından sonra əsas ibadət başlayacaq:
"Bizim zəvvarlar da avtobuslarla xüsusi çadır məntəqəyə daşınıblar, hazırda dincəlirlər. Günorta xütbə veriləcək, namaz qılınacaq və axşam namazına qədər zəvvarlar dua edəcəklər.
Ərafat günü bura yetişməyən zəvvarın həcci olmaz, yəni həcc məhz buradan başlayır.
Axşam namazından sonra zəvvarlar Müzdəlifədə gecələyib, sabah səhər Camarata daş atmağa gedəcəklər, qurban kəsib, saçlarını qırxıb, təvaf və səy edərək ehramdan çıxacaqlar".
Qeyd edək ki, Azərbaycandan həcc ziyarətinə səfər mayın 25-dən başlayıb. Ümumilikdə 1 250 azərbaycanlı zəvvar təyyarələrlə mayın 31-dək Məkkəyə çatdırılıb. Həcc ziyarətinin başa çatmasından sonra zəvvarlar təyyarə reysləri ilə iyunun 21-dək Vətənə qayıdacaqlar.
Rəhim Əliyev
:640.jpg)
