"Bu gün Qəməri (Ay) təqvimi ilə zil-hiccə ayının 8-dir və zəvvarlar artıq həcc əməllərinin icrasına başlayıblar".
Bu barədə Oxu.Az-a Qafqaz Müsəlmanları İdarəsinin (QMİ) Xarici əlaqələr şöbəsinin müdiri, Həcc elektron sisteminin rəhbəri Vüsal Cahangiri məlumat verib.
QMİ rəsmisinin sözlərinə görə, zəvvarlar avtobuslarla Məkkədəki hotellərdən Mina çölündəki çadır düşərgəsinə daşınıblar:
"Artıq zəvvarlar həccə niyyətləniblər və ehramlarını geyiniblər. Sabah sübh namazından sonra onların Ərafat çölünə daşınması planlaşdırılır.
Zəvvarların hamısının səhhəti yaxşıdır, hamıda bayram əhvali-ruhiyyəsi var".
Qeyd edək ki, Azərbaycandan həcc ziyarətinə səfər mayın 25-dən başlayıb. Ümumilikdə 1 250 azərbaycanlı zəvvar təyyarələrlə mayın 31-dək Məkkəyə çatdırılıb. Həcc ziyarətinin başa çatmasından sonra zəvvarlar təyyarə reysləri ilə iyunun 21-dək Vətənə qayıdacaqlar.
Rəhim Əliyev
