Bu gün Azərbaycanın Xalq artisti, aktyor, teatr rejissoru İlham Əhmədovun (İlham Namiq Kamal) doğum günüdür.
Oxu.Az xatırladır ki, İlham Əhmədov 1949-cu il yanvarın 9-da Bakı şəhərində anadan olub. Əslən Şamaxıdandır.
O, 1966-cı ildə 31 saylı orta məktəbi bitirərək Mirzəağa Əliyev adına Azərbaycan Dövlət Teatr İnstitutunun dram və kino aktyorluğu fakültəsinə daxil olub.
SSRİ Xalq artisti Adil İsgəndərovun və Azərbaycan SSR Xalq artisti Rza Təhmasibin kursunda təhsil alıb. Tələbə vaxtı fransız ədibi Jan-Batist Molyerin "Jorj Danden" satirik komediyasının tamaşasında baş qəhrəman rolunu uğurla oynayıb.
1968-ci il dekabrın 16-da onu institutun tədris teatrının aktyor truppasına qəbul ediblər. Bu kollektivdə "Mirzə Cavad" ("Aydın", Cəfər Cabbarlı), "Şvester" ("Meteor", Fridrix Dürrenmatt), "Lomov" ("Elçilik", Anton Çexov), "Rekrutçu" ("Sahildə bir ev", Stefan Sveyq), "Baş katib" ("Sehirli kreslo", Friteş Korinti), "Molla Səbzəli" ("Üləma məclisi", Mirzə Ələkbər Sabirin şerləri əsasında) rollarını oynayıb.
O, 1971-ci il noyabrın 25-dən 1972-ci il fevralın 2-dək Azərbaycan Dövlət Gənc Tamaşaçılar Teatrının aktyor truppasında olub. Fevralın 3-dən Akademik Milli Dram Teatrında aktyor işləyib.
1989-cu il martın 20-də istedadlı gənc rejissor Hüseynağa Atakişiyevin təşkil etdiyi Gənclər Teatrına keçib. Bu kollektiv 1993-cü il yanvarın 26-dan Azərbaycan Dövlət Gənclər Teatrı kimi fəaliyyət göstərir. İlham Namiq Kamal bu gənc kollektivin səhnəsində dörd il çalışıb. Burada Stanislav Stratiyevin "Çarəsiz sərnişinlər" ("Məsuliyyətsiz"), Rəhman Əlizadənin "Dadaşbala əməliyyatı" ("Dadaşbala"), İsi Məlikzadənin "Sultanqulu körpüsü" ("Sultanqulu"), Robber Tomanın "Arvadımın qatili" ("Daniel"), Vaqif Səmədoğlunun "Dağ tikirik" ("Kələntər"), Georgi Xuqayevin "Arvadımın əri özüməm" ("Kazbek") pyeslərinin səhnə təfsirində, "Gül, sevin, gül" (müxtəlif sifət-maskalar) şou-tamaşasında baş rolları ifa edib.
Dövlət Gənclər Teatrında işləməklə yanaşı, eyni zamanda, 1989-1991-ci illərdə paralel olaraq Azərbaycan Dövlət Musiqili Komediya Teatrında aktyorluq edib. Bu teatrda dramaturq Georgi Xuqayevin və bəstəkar Eldar Mansurovun "Sevgilimin anası və yaxud evlənmə əhvalatı" ("Albadam"), Cahangir Aslanoğlu və Həsənağa Qurbanovun "Qarğa, məndə qoz var" ("Adil", "Farmazov", "Aşıq", "Professor" və "Əyyaş"), rus bölməsində Eduardo de Filippov və Fərəc Qarayevin "Fulimeno Marturano" ("Domeniko Soriano") musiqili komediyalarında oynayıb.
1993-cü il iyunun 14-də bu truppadan çıxıb və özünün "İlham" Miniatür Teatrını yaradıb. Direktor və bədii rəhbər olduğu bu teatrda həm quruluşçu rejissor, həm də aktyor kimi çalışıb. Teatrda hazırlanan bütün tamaşalara quruluş verir və onların əksəriyyətində baş rollarda oynayır.
1995-ci ildən Azərbaycan Dövlət Mədəniyyət və İncəsənət Universitetində dərs deyir, "Estrada sənəti" kafedrasının müdiridir.
2013-cü il iyunun 25-də "Şöhrət" ordeni ilə təltif edilib.
2014-cü il martın 10-da Azərbaycan Teatr Xadimləri İttifaqının təsis etdiyi "Sənətkar" medalına layiq görülüb.
2023-cü il dekabrın 13-də Azərbaycan Dövlət Mədəniyyət və İncəsənət Universitetinin 100 illiyi münasibətilə Azərbaycan Respublikası Prezidentinin fəxri diplomu ilə təltif edilib.
