Xaricdə təhsil alan tələbələrin Azərbaycan universitetlərinə köçürülməsi ilə bağlı bir qrup tələbə problem yaşayıb.
Bununla bağlı Oxu.Az-a müraciət daxil olub.
Qeyd olunub ki, kütləvi imtinalar səbəbindən apellyasiya müraciətlərinin avqust ayının sonunadək cavablandırılacağı bildirilsə də, hələ də bu barədə onlara cavab verən olmayıb.
Bununla bağlı Oxu.Az-ın sorğusuna cavab olaraq Elm və Təhsil Nazirliyindən bildirilib ki, tələbələrin köçürülməsi ilə bağlı apellyasiya müraciətlərinin nəticələri indiki halda emal prosesindədir:
"Nəticələr hazır olduqdan sonra ictimaiyyətə müvafiq məlumat təqdim olunacaq".
Elm və Ali Təhsil üzrə Dövlət Agentliyindən isə qeyd olunub ki, ümumilikdə, xaricdə təhsil alan tələbələrin Azərbaycan universitetlərinə köçürülməsi ilə bağlı 2025/26-cı tədris ili üçün 11 xarici ölkədən 100-dən artıq müraciət daxil olub".
İmtina edilən müraciətlərin sayı ümumi müraciətlərin 10 faizindən çox deyil. İmtinanın əsas səbəbləri kimi qəbul üçün qanunvericilikdə nəzərdə tutulmuş əsasların mövcud olmaması və təhsil göstəricilərində uğursuzluq müəyyən edilib. Qeyd edirik ki, attestat əsasında xarici ali təhsil müəssisələrinə qəbul olunmuş şəxslər qüvvədə olan Qaydalara əsasən, ölkə daxilindəki ali təhsil müəssisələrinə köçürülə bilməzlər", - deyə məlumatda bildirilir.
Əzizə İsmayılova
