Xırdalan əhərinin Sülh küçəsində kanalizasiya xəttindən küçəyə çirkab suyun axması və əraziyə üfunət yayılması ilə bağlı yayılan görüntülərə müvafiq qurum tərəfindən münasibət bildirilib.
Bu barədə Oxu.Az-ın sorğusuna cavab olaraq Azərbaycan Dövlət Su Ehtiyatları Agentliyinin (ADSEA) tabeliyində Regional Su Meliorasiya Xidmətindən məlumat verilib.
Bildirilib ki, daxil olmuş müraciət əsasında Regional Su Meliorasiya Xidmətinin Abşeron Su Meliorasiya Sistemlərinin İstismarı İdarəsinin mütəxəssisləri tərəfindən əraziyə operativ baxış keçirilib:
"Aparılmış araşdırma zamanı kanalizasiya xəttində yaranmış tutulma müəyyən edilərək operativ qaydada aradan qaldırılıb. Görülmüş tədbirlər nəticəsində ərazidə müşahidə olunan kanalizasiya problemi tam həll edilib, sistemin normal fəaliyyəti bərpa olunub".
Xırdalan şəhərinin Sülh küçəsində sakinlər kanalizasiya problemindən təngə gəliblər.
Ərazidə yaşayan sakinlər bununla bağlı Oxu.Az-a müraciət ediblər.
Onlar qeyd ediblər ki, kanalizasiya quyusundan ətrafa çirkab su axır, nəticədə yolun bir hissəsində gölməçə yaranıb. Həmçinin bildirilib ki, ərazidə antisanitar vəziyyət müşahidə olunur.
Sakinlər problemin uzun müddətdir davam etdiyini bildirirlər. Onların sözlərinə görə, əraziyə yayılan kəskin üfunət gündəlik həyatda ciddi narahatlıq yaradır.
Məsələ ilə bağlı aidiyyəti quruma sorğu ünvanlanıb.
