Bakının Yasamal rayonunda yaşayış evində baş vermiş partlayış zamanı xəsarət alanların son vəziyyəti açıqlanıb.
Bu barədə Oxu.Az-a Tibbi Ərazi Bölmələrini İdarəetmə Birliyindən (TƏBİB) məlumat verilib.
Bildirilib ki, iyulun 4-də Yasamal rayonu, Ümid Əkbərov küçəsində yerləşən yaşayış evində baş vermiş partlayış nəticəsində xəsarət alan üç nəfərin (iki qadın, bir kişi) Nərimanov Tibb Mərkəzinin nəzdində fəaliyyət göstərən Yanıq Mərkəzində müalicəsi davam etdirilir. Onların vəziyyəti ağır qiymətləndirilir.
Məlumata görə, hadisə baş verən ərazidən keçərkən xəsarət alaraq Kliniki Tibbi Mərkəzə yerləşdirilən bir nəfər (qadın) isə ambulator müalicə üçün evə buraxılıb.
Qeyd edək ki, iyulun 4-də ikimərtəbəli yaşayış evinin birinci mərtəbəsində yanğınla müşayiət olunan partlayış baş verib. Hadisə nəticəsində ümumi sahəsi 250 kvadratmetr olan evin birinci mərtəbəsində yerləşən iki otağın yanar konstruksiyaları 50 kvadratmetr sahədə yanıb. Partlayış zamanı 4 nəfər müxtəlif dərəcəli bədən xəsarətləri alıb, xilasedicilər 2010-cu il təvəllüdlü yeniyetmənin meyitini dağıntılar altından çıxararaq aidiyyəti üzrə təhvil veriblər.
