Balaxanı neftçiləri Vətən uğrunda canından keçən qəhrəman həmkarlarını yad ediblər

Azərbaycanın müstəqilliyi, suverenliyi və ərazi bütövlüyü uğrunda canlarından keçən bütün şəhidlərin xatirəsini əziz tutan neftçilər Anım Günündə qəhrəman həmkarlarını yad ediblər.

"Balakhani Operating Company LTD"nin ərazisində yerləşən "Şəhidlər Unudulmur" abidəsi qarşısında toplaşan Balaxanı və Suraxanı neftçiləri Vətən uğrunda şücaətlə döyüşüb özlərini qurban verən şəhidlərin xatirəsini bir dəqiqəlik sükutla yad edib, abidənin qarşısına çiçəklər düzüblər.

Anım Günü tədbirində "Balakhani Operating Company LTD"nin prezidenti Rövşən Rzayev bu gün burada toplaşanlar vəzifələrindən asılı olmayaraq 2020-ci ilin bu günü Ali Baş Komandanın ətrafına "dəmir yumruq" kimi birləşən xalqın üzvü kimi gəliblər. Şəhid və qazilərimizin qəhrəmanlıqları nəticəsində Azərbaycanın hər qarışında suverenlik bərpa olunub, dövlət bayrağımız dalğalanır. Rövşən Rzayev xatırladıb ki, Balaxanı və Suraxanı neftçiləri arasında 400-ə yaxın şəhid ailəsinin üzvləri və qazilər çalışır. Onların Vətən uğrunda göstərdikləri hünərləri mədənlərdə çalışan hər kəsə xatırlatma və nümunədir.

Anım Günü tədbirin sonunda şirkət rəhbərliyi Balaxanı ərazisindən olan Vətən müharibəsi qəhrəmanları, şəhid olmuş Əmrulla Əliyev, Musa Abışov və Rəşad Mikayılovun ailə üzvləri ilə görüşüb, daim dəstəkləri ilə valideynlərinin yanında olduqlarını vurğulayıblar.