Sentyabrın 21-də Cenevrədə yerləşən "Salle Frank Martin" zalında "Piano Trio Areal" klassik Azərbaycan və dünya musiqisini birləşdirən debüt albomunu təqdim edib. Bu münasibətlə təşkil edilmiş proqramda Frank Martinin "İrlandiya Xalq Nəğmələri üzərində Trio", Dmitri Şostakoviçin mi-minor, Op. 67 II Piano Triosu və Tofiq Bakıxanovun III Piano Triosu səsləndirilib. Konsert ansamblın Kelt xalq melodiyalarından tutmuş Şostakoviçin müharibə dövrü elegiyasına, muğam ritmlərini Qərbin klassik formaları ilə sintez etmiş T.Bakıxanov musiqisinə qədər müxtəlif ənənələri bir araya gətirmək bacarığını nümayiş etdirib.
Xüsusi diqqətəlayiq məqam albomda görkəmli bəstəkar Tofiq Bakıxanovun III Fortepiano Triosunun dünya üzrə ilk səsyazmasının yer almasıdır. Əsər Azərbaycan musiqi irsinin zənginliyini əks etdirir, həm Şərq, həm də Qərb ənənələri ilə ritmik və melodik bağlara malikdir. Yeni albom T.Bakıxanov musiqisinin müxtəlif beynəlxalq festivallarda və böyük konsert salonlarında ifa olunmasına, bununla da onun yaradıcılığının daha geniş auditoriyaya çatmasına təkan verir.
Layihə Avropada Azərbaycan mədəni irsinin təbliğatçısı kimi tanınan və mərkəzi Cenevrədə yerləşən "Heritage Association"ın dəstəyi və sponsorluğu, eləcə də yenilikçi musiqi layihələrini dəstəkləyən "Odradek Records"la əməkdaşlıq sayəsində gerçəkləşib.
Albom İtaliyanın Adriatik sahilində, Peskara-Montesilvano şəhərində yerləşən müasir "The Spheres" studiyasında yazılıb. Akustik musiqi üçün xüsusi dizayn edilmiş bu studiya yüksək səviyyəli audio və video avadanlıqları ilə "Piano Trio Areal"ın zərif ifalarının mükəmməl səviyyədə qeydə alınmasına şərait yaradıb. Frank Martinin adını daşıyan və klassik musiqi konsertlərinin keçirildiyi ən nüfuzlu məkanlardan sayılan "Salle Frank Martin" zalında baş tutan təqdimata fəxri qonaq qismində məşhur bəstəkarın nəvəsi Denis Martin də dəvət edilib. Müxtəlif ölkələri təmsil edən dinləyicilərin, peşəkar musiqiçilərin rəylərinə görə, bu cür layihələr mədəniyyətlərarası mübadiləyə güclü impuls verir, eyni zamanda Azərbaycanın zəngin irsinin gələcək nəsillərə ötürülməsində mühüm rol oynayır.
Trio üzvləri skripkaçı Cəmilə Qarayusifli, violonçel ifaçısı Sandro Mezaros və pianoçu Darya Korotkova gənc, beynəlxalq səviyyədə tanınmış istedadlı musiqiçilərdir. Onların dərin emosional və təsirli ifası Cenevrə tamaşaçıları tərəfindən böyük rəğbətlə qarşılanıb və ansamblın musiqi vasitəsilə mədəniyyətləri birləşdirmək missiyasını bir daha nümayiş etdirib.
Albomu "Spotify", "Apple Music" kimi əsas platformalarda, eləcə də ansamblın rəsmi kanalları vasitəsilə dinləmək olar.
