Amerika Birləşmiş Ştatlarının Florida ştatında üzməyin qadağan olunduğu ərazidə suya girən uşaq alliqatorun hücumundan sağ çıxmağı bacarıb.
Oxu.Az xəbər verir ki, hadisə barədə "The Mirror" nəşri məlumat yayıb.
Hadisə Sprinq-Hill şəhərində yerləşən "Weeki Wachee" təbiət qoruğunda qeydə alınıb. Florida Balıq və Vəhşi Təbiətin Mühafizəsi Komissiyasından verilən məlumata əsasən, içərisində azyaşlının da olduğu qrup qadağan edilmiş zonaya daxil olub. Məhz bu zaman suda uzunluğu təqribən 3,6 metrə çatan alliqator uşağa hücum edib.
Azyaşlı yırtıcının caynağından qurtularaq digər şəxslərlə birlikdə qumluq sahilə çıxa bilib. Lakin onlar həmin yerdən müstəqil şəkildə geri dönə bilməyiblər. Əraziyə cəlb olunan xilasetmə qrupu insanları oradan çıxarıb və xəsarət alan uşaq tibb müəssisəsinə yerləşdirilib. Qol və ayaq nahiyəsindən yaralanan azyaşlıya tibbi yardım göstərildikdən bir neçə saat sonra o, xəstəxanadan evə buraxılıb.
