ABŞ-nin cənub və şimal bölgələrini təsir altına alan qar fırtınası insan ölümünə səbəb olub.
Bu barədə Oxu.Az "Haber Global"a istinadən xəbər verir.
Məlumata əsasən, qar fırtınası və şiddətli soyuqlar nəticəsində azı 4 nəfər həyatını itirib. Rəsmilərin bildirdiyinə görə, Austin şəhərində 2 nəfər, Corciyada 1 nəfər və Miluokidə 1 nəfər ölüb.
Ölkənin cənubundakı Texas ştatında magistral yollar və hava limanları bağlanıb, Luiziana ştatında isə qar fırtınası xəbərdarlığı edilib. Luiziana, Missisipi və Alabama da daxil olmaqla, çox sayda ştatda kəskin soyuqlar səbəbindən fövqəladə vəziyyət elan edilib.
ABŞ-nin cənubunda ən güclü yağıntının qeydə alındığı Luiziana ştatının Reyn şəhərində qarın qalınlığı 25 santimetrə çatıb. Ölkənin şimalındakı Nyu-Yorkun bəzi bölgələrində isə qarın qalınlığı təqribən 46 santimetr təşkil edib. Şiddətli qış fırtınası səbəbindən ABŞ-də 2200-dən çox təyyarə reysi ləğv edilib, 3000 uçuş təxirə salınıb.
Qeyd edək ki, Milli Meteoroloji Xidmətdən ötən gün verilən açıqlamada qarın nadir müşahidə olunduğu körfəz sahilində tarixi yağıntıların olacağı, Texasın şərqindən Floridanın şimal-qərbinə qədər saatda 3 santimetr və ya daha çox qarın yağacağı proqnozlaşdırılmışdı.
