Amerika Birləşmiş Ştatlarının hazırkı prezidenti Donald Trampın vəzifədən kənarlaşdırılması məqsədilə keçirilən aksiyada çıxış edən ABŞ Hərbi Hava Qüvvələrinin mayoru Kapitoli polisi tərəfindən həbs edilib.
Oxu.Az xəbər verir ki, bu barədə məlumatı "NBC News" telekanalı yayıb.
ABŞ hərbçisi Ceyson Uotson çərşənbə günü dövlət başçısı D.Trampın və vitse-prezident Cey Di Vensin istefası tələbi ilə keçirilən aksiyada nitq söylədikdən sonra saxlanılıb. Sözügedən aksiya Konqres üzvlərini prezidentin impiçmenti istiqamətində addımlar atmağa səsləyən "Kənarlaşdırma Koalisiyası" (Removal Coalition) adlı ictimai fəallar qrupu tərəfindən təşkil olunub. Tədbirdə ABŞ liderinin impiçmenti məsələsini dəfələrlə gündəmə gətirən Demokratlar Partiyasından olan konqresmen El Qrin də qatılıb.
"Əgər Konqres El Qrinin nümunəsinə əməl etsəydi, biz bütün Tramp Administrasiyasını kənarlaşdıra bilərdik. Lakin Konqres üzvləri hələ də andlarına sadiq qalmağın vacibliyini dərk etmirlər. Bu səbəbdən biz onları dayanmadan və davamlı vətəndaş müqaviməti yolu ilə inandırmağa məcburuq", - deyə mayor çıxışında qeyd edib.
O, həmçinin Tramp və Vens cütlüyünü İran və Venesuela ilə bağlı atılan addımlara, eləcə də mövcud hökumətin miqrasiya siyasətinə görə sərt şəkildə qınayıb.
Kapitoli polisinin verdiyi açıqlamaya görə, qanunverici orqan ərazisində Konqres üzvünün iştirakı olmadan hər hansı nümayişin keçirilməsi qeyri-qanunidir. Bildirilib ki, hərbçi binanın ərazisinə konqresmenlə birlikdə daxil olub. "Konqresmen ərazini tərk etdikdən sonra polis əməkdaşları qanunsuz aksiyanı dayandırmağı tələb etdilər və əks halda onun saxlanılacağını bildirdilər. Lakin o, qanuni tələblərə məhəl qoymadı", - deyə hüquq-mühafizə orqanlarının açıqlamasında qeyd edilib.
Mayor icazəsiz aksiya təşkil etmək və ictimai asayişi pozmaq ittihamı ilə həbs olunub.
Xatırladaq ki, Donald Tramp Amerika Birləşmiş Ştatları tarixində barəsində iki dəfə impiçment prosesi başlanmış yeganə prezidentdir. Bu hadisələrin hər ikisi onun ilk prezidentlik dövrünə, yəni 2019 və 2021-ci illərə təsadüf edir və hər iki halda impiçment qərarı Senat tərəfindən qəbul edilməyib. D.Tramp dəfələrlə vurğulayıb ki, demokratların onu yenidən vəzifədən uzaqlaşdırmağa cəhd edəcəklərinə əmindir.
