ABŞ Dövlət katibi Marko Rubio yaxın həftələrdə Ukrayna ilə Rusiya arasında sülh danışıqlarının bərpası imkanının aydınlaşdırılması üçün müvafiq addımlar atılacağını bəyan edib.
Oxu.Az-ın məlumatına görə, o bu barədə "Fox News"a açıqlama verib.
Dövlət katibi qeyd edib ki, tezliklə Rusiya-Ukrayna münaqişəsinin yekunlaşdırılması üçün diplomatik fəaliyyətlərin gücləndirilməsi planlaşdırılır.
"Qarşıdakı bir neçə həftədə Rusiya və Ukrayna arasında müzakirələrin bərpa olunma ehtimalını və bu müharibəni bitirə biləcəyimizi müəyyənləşdirməyə yönəlmiş konkret cəhdləri görəcəksiniz", - deyə M.Rubio bildirib.
Bununla belə, diplomatın bildirdiyi kimi, bu prosesin uğuru zəmanət altında deyil.
"Hər iki tərəfin kifayət qədər aydın qırmızı xətləri olduğunu və bu qırmızı xətləri bir az daraltmayana qədər istənilən nəticəni əldə edə bilməyəcəyimizi də başa düşürük", - deyə ABŞ dövlət katibi bəyan edib.
