ABŞ Hərbi Hava Qüvvələrinin "Boeing C-17 Globemaster III" hərbi-nəqliyyat təyyarəsi Vnukovo hava limanından havaya qalxıb. Təyyarə Riqaya istiqamət alıb.
Oxu.Az RBC-yə istinadən xəbər verir ki, bu, "Flightradar24"ün məlumatlarından aydın olur.
"CBS News" və "Axios" daha əvvəl mənbələrə istinadən Mərkəzi Kəşfiyyat İdarəsinin (MKİ) direktoru Con Ratkliffin Rusiyaya getdiyini bildirmişdilər. "CBS News"un müxbiri Cennifer Ceykobs Ratkliffin Rusiyaya "C-17" hərbi-nəqliyyat təyyarəsi ilə yollandığını qeyd edib.
Mənbələr səfərin məqsədinin "Moskvada görüşlər" olduğunu bildiriblər. MKİ direktoru Rusiyaya sonuncu dəfə təxminən beş il əvvəl - 2021-ci ilin noyabrında səfər etmişdi.
Mərkəzi Kəşfiyyat İdarəsinin (MKİ) direktoru Con Ratkliff görüşlər keçirmək üçün ABŞ Hərbi Hava Qüvvələrinə məxsus "Boeing C-17" təyyarəsi ilə Moskvaya gedib.
Oxu.Az xəbər verir ki, bu barədə "CBS News"un müxbiri Cennifer Ceykobs mənbələrə istinadən "X" sosial şəbəkəsində bildirib.
Ratkliffin kiminlə görüşəcəyi barədə təfərrüat açıqlanmır.
Moskvada ABŞ-li diplomatlara məxsus nömrə nişanlı avtomobil korteji görüntülənib.
Oxu.Az xəbər verir ki, sosial şəbəkələrdə Moskva küçələrində qırmızı qeydiyyat nişanlı avtomobillərin hərəkət etdiyi görüntülər yayılıb.
Eyni zamanda Kremldən hələ ki, bununla bağlı heç bir məlumat verilmir.
Qeyd edək ki, Rusiya prezidentinin mətbuat katibi Dmitri Peskov daha əvvəl bildirmişdi ki, bu həftə Kremldə ABŞ Administrasiyasının nümayəndələri ilə görüş keçirmək planlaşdırılmır. O, həmçinin qeyd edib ki, Moskvaya eniş edən ABŞ təyyarəsi ilə bağlı məlumatı yoxdur.
Avqustun 25-də səhər ABŞ Hərbi Hava Qüvvələrinə məxsus, bort nömrəsi RCH4555 olan "Boeing C-17 Globemaster III" hərbi nəqliyyat təyyarəsi Moskvanın Vnukovo hava limanına eniş edib.
Oxu.Az-ın xəbərinə görə, bu barədə RBC nəşri məlumat yayıb.
Məlumata əsasən, təyyarə təxminən Moskva vaxtı ilə saat 8:50-də (Bakı vaxtı ilə saat 9:50 - red.) Riqadan yola düşüb və Moskva vaxtı ilə təxminən saat 10:04-də onun marşrutu Vnukovo hava limanında başa çatıb. Flightradar24.com xidməti bildirib ki, hazırda təyyarənin uçuşunu izləmir, çünki təyyarə əhatə dairəsindən kənardadır və ya artıq eniş edib.
Bu təyyarə tərəfindən həyata keçirilən son uçuşlar barədə məlumatlar göstərir ki, təyyarə avqustun 23-də Riqaya enib, başlanğıc nöqtəsi kimi ABŞ-nin Merilend ştatındakı Kemp-Sprinqs göstərilib. Kemp-Sprinqsdə isə ABŞ prezidentinə məxsus "Air Force One" təyyarəsinin olduğu Endryus aviabazası yerləşir.
