ABŞ-nin Florida və Corciya ştatlarında bir neçə məktəb uşaqlara qarşı silahlı hücumların qarşısını almaq məqsədi ilə mühafizə dronları sistemlərini tətbiq etməyə başlayıb.
Oxu.Az xəbər verir ki, bu barədə "The Wall Street Journal" məlumat yayıb.
Qeyd olunur ki, təhsil müəssisələrinin mühafizəsi üçün yeni üsul məktəblilərin sinif yoldaşlarına hücum etmək üçün odlu silahdan istifadə hallarının artması ilə bağlıdır. Eksperiment çərçivəsində Florida və Corciyanın məktəblərinə Texasın "Mithril Defense" şirkətinin PUA-larının tətbiqi üçün büdcə ayırmağa başlayıb.
Şirkətin dronları məktəb ərazisində xüsusi nöqtələrdə quraşdırılır və həyəcan siqnalı verilənə qədər həmin yerdə gözləmə rejimində olur.
Silahlı hücum zamanı saatda 160 kilometrə qədər sürətlə uçan dronlar öz yerlərini tərk edir və operatorlar tərəfindən hadisə yerinə yönəldilir.
Aparatlar gözqamaşdıran stroboskop işıqları, gözyaşardıcı qaz püskürtmə sistemləri və karlıq yaradan səs qurğuları ilə təchiz edilib. Bundan əlavə, sözügedən PUA-lar hücum edənləri fiziki olaraq ayaqlarından tutaraq yerə yıxmağa qadirdir.
Orta hesabla belə bir sistemin istismarı hər qorunan uşaq üçün büdcəyə ayda 8 dollara başa gəlir. Əgər bu cür eksperimental sistemlər böhran vəziyyətlərində özlərini doğruldarsa, ştatların təhsil orqanları belə dronların məktəblərdə tətbiqini genişləndirməyi planlaşdırırlar.
