ABŞ-nin nəhəng neft şirkətləri "ExxonMobil" və "Chevron" ABŞ-İran münaqişəsindən qaynaqlanan neft və yanacaq qiymətlərinin artması sayəsində ikinci rübün yekunlarına əsasən təxminən 25 milyard dollar xalis mənfəət əldə edə bilərlər.
Oxu.Az-ın xəbərinə görə, bu barədə "Financial Times" (FT) nəşri yazıb.
"Gözlənilir ki, "ExxonMobil" və "Chevron" ikinci rüb üçün müvafiq olaraq 15 milyard dollar və 9.7 milyard dollar xalis mənfəət barədə elan edəcəklər və bu da əvvəlki rübün göstəricilərini üç dəfə üstələyir, çünki xam neft, dizel yanacağı və aviayanacaq üçün yüksək qiymətlər gözlənilməz gəlirlərin əldə edilməsinə səbəb olur", - deyə nəşr bildirib.
Qeyd edilir ki, həmçinin "Marathon" və "Valero" neft emalı şirkətləri də yüksək mənfəət göstəriciləri nümayiş etdirə bilərlər. Sənayenin gəlir artımı İranın Hörmüz boğazını əhəmiyyətli dərəcədə bağlamasından sonra yaranmış genişmiqyaslı neft tədarükü kəsintiləri fonunda qiymətlərin kəskin şəkildə artması ilə əlaqədardır. ABŞ şirkətləri dünya bazarında təklif defisitindən istifadə edərək, neft və neft məhsullarının ixracını artırıblar.
