İranın Küveytdəki Amerika Birləşmiş Ştatlarının hərbi obyektlərinə endirdiyi zərbədən sağ çıxan ABŞ-li hərbçilər rəhbərliyi "Əş-Şüveyx" limanındakı təhlükəsizlik risklərini lazımınca qiymətləndirməməkdə günahlandırıblar.
Oxu.Az xəbər verir ki, bu barədə "The Washington Post" qəzeti silahlı qüvvələrin nümayəndələrinə istinadən məlumat yayıb.
Nəşr bildirib ki, yüksəkrütbəli zabitlər "Əş-Şüveyx"in İran hücumu üçün əsas hədəflərdən biri olması barədə kəşfiyyat xəbərdarlıqlarına məhəl qoymayıblar. Obyektin kifayət qədər qorunmadığına dair rəylərə baxmayaraq, ABŞ komandanlığı nizami ordunu həmin ərazidə yerləşdirmək qərarına gəlib. Müdafiə boşluqlarından xəbərdar olan bəzi hərbçilər təhlükəsizliyin gücləndirilməsi üzərində çalışsalar da vəsait çatışmazlığı səbəbindən layihə sonradan dayandırılıb.
Hərbçilər həmçinin iddia ediblər ki, obyektdəki yüksəkrütbəli zabitlər hava hücumu xəbərdarlığına rəğmən, əsgərlərə sığınacaqları tərk edərək işə qayıtmaları üçün dəfələrlə təzyiq göstəriblər.
Aparılan daxili araşdırma çərçivəsində kiməsə qarşı cəza tədbirlərinin görülməsi nəzərdə tutulmur. Belə ki, WP nəşrinin mənbəsinə əsasən, limanın dron və raketlərə qarşı çoxsəviyyəli müdafiə sisteminə malik olduğu iddia edilir. Eyni zamanda, ABŞ komandanlığı bütün ittihamları rədd edərək, hərbi obyektin etibarlı şəkildə qorunduğunu bildirir.
