Rusiyanın Kiyevə endirdiyi raket zərbəsi nəticəsində ABŞ-nin yüksək dəqiqlikli zərbə pilotsuz uçuş aparatları (PUA) istehsal edən "Terminal Autonomy" şirkətinin zavodu məhv edilib.
Oxu.Az xəbər verir ki, bu barədə "The Guardian" nəşri məlumat yayıb.
Məlumata görə, Rusiyanın Kiyevə endirdiyi zərbə nəticəsində ABŞ-nin Delaver ştatında qeydiyyatdan keçmiş "Terminal Autonomy" şirkətinin Ukraynadakı istehsalat sahəsi dağıdılıb.
Şirkətin fəaliyyəti ilə tanış olan mənbənin nəşrə verdiyi məlumata əsasən, müəssisədə Rusiyanın radioelektron mübarizə vasitələrinə qarşı davamlı tuşlama sistemləri ilə təchiz edilmiş yüksək dəqiqlikli, uzaqmənzilli pilotsuz uçuş aparatları istehsal olunurdu.
"The Guardian" nəşrinin qiymətləndirməsinə görə, bu, Rusiya-Ukrayna müharibəsinin başlanmasından bəri Rusiyanın raket zərbəsi nəticəsində Amerika şirkətinə məxsus obyektin məhv edilməsi ilə bağlı məlum olan ilk hal ola bilər.
