ABŞ-də ölkənin bütün hava limanlarından uçuşlara tətbiq edilən qadağanın aradan qaldırılmasından sonra hava nəqliyyatı tədricən normal fəaliyyətinə qayıdır.
Oxu.Az xəbər verir ki, bu barədə ABŞ-nin nəqliyyat naziri Şon Daffi "X" sosial şəbəkəsində paylaşım edib.
Daffi bildirib ki, aviareyslərin icrası bərpa olunub və uçuşlar təhlükəsizdir.
"Biz bərpa prosesinə dəstək vermək üçün aviaşirkətlərlə sıx əməkdaşlıq edirik. Hələ də bəzi reyslərdə gecikmələr və ləğvlər olacaq. Çünki aviadaşıyıcılar təyyarələri və uçuş heyətlərini ən çox ehtiyac duyulan istiqamətlərə yönləndirmək üçün uçuş cədvəllərində dəyişiklik edirlər", - deyə nazir əlavə edib.
Qeyd edək ki, uçuşlara qadağa avadanlığın işində yaranan texniki nasazlıq səbəbindən tətbiq olunmuşdu.
Belə ki, ABŞ Federal Aviasiya İdarəsi (FAA) noyabrın 13-də uçuşların idarə edilməsi üçün istifadə olunan avadanlıqda yaranan nasazlıqla əlaqədar ölkənin bütün hava limanlarından uçuşları təxminən 4,5 saat müddətinə dayandırıb.
Sonradan nasazlığın köhnəlmiş avadanlıqdan qaynaqlandığı müəyyən edilib. Daffinin sözlərinə görə, həmin avadanlığın yenilənməsi üçün təxminən 50 milyard dollar tələb olunur.
