Avropa İttifaqı (Aİ) ölkələri Kanadanın Baş naziri Mark Karninin ABŞ və Çinə qarşı birləşmək çağırışı çərçivəsində irəli sürdüyü "unikal alyans" ideyasına o qədər də isti yanaşmayıb.
Oxu.Az xəbər verir ki, bu barədə "Financial Times" nəşri məlumat yayıb.
Nəşrin mənbələrinə görə, Karninin Avropanı Kanada ilə iqtisadi tərəfdaşlığı genişləndirməyə inandırmaq cəhdləri uğursuzluqla nəticələnib. Baş nazirin rəğbət qazanmaq səyləri Ottavaya ticarətdə xüsusi imtiyazlar verməkdən çəkinən hökumətləri qane edə bilməyib.
"Biz kanadalıları sevirik, lakin hər kəs mövcud imkanları və məhdudiyyətləri reallığa uyğun qiymətləndirir. "Üzvlükdən başqa hər şey" ifadəsi qulağa xoş gəlsə də, kifayət qədər düşünülmüş təsir bağışlamır. Lakin mən Karnini bu cəhdinə görə qınamıram", - deyə adının çəkilməsini istəməyən diplomatlardan biri qeyd edib.
Digər bir diplomatın sözlərinə görə, ABŞ Prezidenti Donald Trampın Kanada ilə münasibətlərin kəskin şəkildə yaxşılaşmasına göstərəcəyi reaksiya ilə bağlı narahatlıqlar bəzi Aİ paytaxtlarına da təsir edir. Başqa bir rəsmi isə bildirib ki, burada söhbət Rusiya qarşısında NATO-nun müdafiəsinə ehtiyac duyan ölkələrdən, xüsusən də Baltikyanı dövlətlərdən gedir.
Xatırladaq ki, bir müddət əvvəl Mark Karni ABŞ ilə yaşanan ticarət ziddiyyətləri fonunda Aİ ilə "unikal alyans" qurmaq və əlaqələri daha da dərinləşdirmək planlarını açıqlamışdı.
