Avropa İttifaqına üzv dövlətlər Avropa Xarici Fəaliyyət Xidmətinin (EEAS) və onun rəhbəri Kaya Kallasın işindəki uğursuzluqlar fonunda qurumun diplomatik xidmətində mümkün radikal islahat variantları üzərində işləyirlər.
Oxu.Az xəbər verir ki, bu barədə "Financial Times" nəşri özəl mənbələrinə istinadən məlumat yayıb.
Qəzeti bilgiləndirən mənbə deyib:
"Məlumdur ki, Avropa Xarici Fəaliyyət Xidməti (EEAS) müasir dünyanın tələblərinə uyğun fəaliyyət göstərmir. Bu, disfunksionaldır. Problem konstruktivdir, ona görə də konstruksiyanı bərpa etmək lazımdır".
Qeyd olunur ki, Avropa ölkələri Kallası və büdcəsi 1 milyard avro olan departamentini səlahiyyətlərdən məhrum etmək, EEAS-in funksiyalarını Avropa İttifaqına üzv ölkələrə ötürmək imkanını da nəzərdən keçirir.
Məlumatına görə, Parisin təklifi Avropa diplomatik xidməti rəhbərinin müstəqilliyinin mümkün məhdudlaşdırılmasını, onun bütün dünyadakı nümayəndəliklər üzərində nəzarətinin zəiflədilməsini əhatə edir. Nəticədə, mənbələrin vurğuladığı kimi, EEAS-in ləğv edilməsi ehtimalı var.
Eyni zamanda üzv ölkələrin nümayəndələri əmindirlər ki, EEAS-in islahatı Brüsselə vəsaitlərə qənaət etməyə və bürokratik aparatı əhəmiyyətli dərəcədə azaltmağa kömək edə bilər.
Bəzi Avropa paytaxtları qeyri-rəsmi şəkildə iddia edirdilər ki, hazırda Avropa Xarici Fəaliyyət Xidməti (EEAS), milli xarici işlər nazirlikləri və Avropa Komissiyası ilə Aİ Şurasının xarici əlaqələr üzrə departamentləri arasında həddən artıq kəsişmə və koordinasiya çatışmazlığı mövcuddur. Üstəlik, Avropa İttifaqını bürümüş böhranlar avropalı siyasətçiləri EEAS-in vaxtında qərarların qəbulunun koordinasiyasında rolunun effektivliyinə şübhə ilə yanaşmağa məcbur edib. Qeyd olunur ki, Kallasın özü də tez-tez kollektiv şəkildə razılaşdırılmalı olan məsələlərlə bağlı şəxsi fikrini önə çəkir.
