Yanvarın 26 və 27-si tarixlərində Yerdə yeni maqnit qasırğası başlaya bilər.
0xu.Az xəbər verir ki, proqnoz Günəş Astronomiyası Laboratoriyası tərəfindən dərc edilib.
Alimlərin məlumatına görə, yaxın günlərdə geomaqnit vəziyyəti sakit olacaq. Belə ki, 22-25 yanvar tarixləri daxil olmaqla hər hansı təhlükəli hadisə gözlənilmir. Lakin artıq yanvarın 26-dan etibarən vəziyyət kəskin şəkildə dəyişə bilər.
Mütəxəssislərin proqnozuna əsasən, həmin gün G1 səviyyəli maqnit qasırğasının baş verməsi ehtimal olunur və bu vəziyyət gün ərzində davam edəcək. Oxşar geomaqnit aktivlik yanvarın 27-də də gözlənilir. Məlumata əsasən, bu, sutka boyu davam edə bilər.
Günəş Astronomiyası Laboratoriyasının (Rusiya Elmlər Akademiyasının Kosmik Tədqiqatlar İnstitutu) rəhbəri Sergey Boqaçov bildirmişdi ki, bir neçə gün əvvəl də belə bir hadisə baş verib: Yer XXI əsrdə qeydə alınmış ən güclü radiasiya fırtınalarından birini yaşayıb.
