Almaniyada ticarət küçəsində partlayışlar qeydə alınıb Sentyabrın 17-də səhər saatlarında naməlum şəxslər tərəfindən Frankfurt şəhərinin mərkəzi ticarət küçəsində iki partlayıcı qurğu işə salınıb.
Oxu.Az xəbər verir ki, bu barədə "Bild" nəşri polisə istinadən məlumat yayıb.
Məlumata görə, polis orqanlarına həyəcan siqnalı yerli vaxtla saat 04:20-də (Bakı vaxtı ilə 06:20-də) daxil olub. Partlayışın biri qəzet köşkü yaxınlığında, digəri isə Berger küçəsi ərazisindəki mağazanın qarşısında baş verib. Xəsarət alanlar barədə məlumat verilmir.
Qeyd edək ki, həftənin əvvəlində Frankfurt şəhərində 24 saat ərzində daha üç partlayış qeydə alınmışdı. Həmin hadisələrlə bağlı Niderlanddan gəlmiş 15 yaşlı şübhəli şəxs saxlanılıb. Polis əməkdaşları bu partlayışların mütəşəkkil cinayətkar qruplaşmalarla əlaqəli olduğunu ehtimal edirlər.
