Ötən gecə Niderlandın paytaxtı Amsterdamın qərb hissəsində - Qezenveld bölgəsindəki yaşayış evlərinin yaxınlığında iki partlayış olub.
Oxu.Az xəbər verir ki, bu barədə "AT5" telekanalı məlumat yayıb.
Bildirilib ki, birinci hadisə yerli vaxtla saat 02:00 (Bakı vaxtı ilə 04:00) radələrində yaşayış binasının önündə qeydə alınıb. Partlayıcı vasitənin işə düşməsi nəticəsində bəzi mənzillərin şüşələri qırılıb və girişdə yanğın başlayıb, az sonra qatı əmələ gəlib.
Xilasedicilər yanğının qarşısını qısa müddətdə alıblar. Tüstüdən zəhərlənən üç sakinə tibbi yardım lazım olub.
Telekanalın məlumatında bildirilir ki, növbəti partlayış təqribən bir saat sonra, yerli vaxtla 03:00-da (Bakı vaxtı ilə 05:00) baş verib. İkinci partlayış əvvəlki ərazidən 1.5 kilometr məsafədəki digər bir çoxmənzilli binanın qarşısında törədilib. Partlayış səbəbindən binanın əsas giriş qapısına ziyan dəyib. Bu insident zamanı xəsarət alanlarla bağlı açıqlama verilməyib.
Hazırda polis tərəfindən istintaq tədbirləri davam etdirilir, şübhəli şəxs qismində saxlanılan yoxdur. Təhlükəsizlik qüvvələri hər iki partlayışın bir-biri ilə əlaqəli olması ehtimalını nəzərdən keçirir və şahidlərin müəyyənləşdirilməsi istiqamətində axtarışlar aparırlar.
