"Avropa süni intellekt texnologiyalarının istehsalçısına çevrilməlidir. Bu, qismən öz muxtariyyətini qorumaq və alışdığı həyat tərzini saxlamaq üçün zəruri olan səmərəlilik artımına nail olmaq baxımından vacibdir".
Oxu.Az "Reuters" agentliyinə istinadən xəbər verir ki, bu barədə Avropa Mərkəzi Bankının (AMB) rəhbəri Kristin Laqard bəyan edib.
Avropa şirkətləri süni intellektə (Sİ) sərmayə qoyurlar, lakin əsasən bu texnologiyaları xaricdən, xüsusən də ABŞ-dən idxal edirlər. Bu da texnologiyalara çıxış imkanının dayandırılacağı təqdirdə onları zəif vəziyyətə salır və potensial olaraq iqtisadiyyatın hər bir sektorunu təhlükə altına qoyur.
"Artıq bir neçə ildən sonra Sİ sərhəddə malları yoxlayacaq, hansı bəyannamələrin audit olunmalı olduğunu müəyyən edəcək, qatarların hərəkətini idarə edəcək, xəstəxanalarda xəstələrin vəziyyətinə nəzarət edəcək və bank ödənişlərini emal edəcək", - deyə Laqard Vyanadakı çıxışı zamanı qeyd edib.
"Çıxış imkanının itirilməsi və ya onun təqdim edilməsi şərtlərinin dəyişdirilməsi dərhal bütün sektorlara təsir göstərəcək. Bu, heç bir ticarət tərəfdaşının Avropaya münasibətdə indiyədək malik olmadığı təsir rıçaqıdır. Ondan istənilən danışıqlarda - məsələn, rüsumlar və ya rəqəmsal xidmətlərə vergilər məsələləri üzrə istifadə oluna bilər", - deyə o əlavə edib.
Aİ və ABŞ əsas müttəfiqlər olsalar da, son zamanlar rüsumlar məsələsi, ABŞ-nin Qrenlandiyanı satın almaqla bağlı tələbləri və siyasi fikir ayrılıqları səbəbindən Amerika qoşunlarının Avropadan çıxarılması kimi bir sıra problemlər nəticəsində aralarındakı etimad sarsılıb.
"Bu vəziyyətdən çıxış yolu Avropanın öz hesablama güclərini inkişaf etdirməsindədir", - deyə o qeyd edib.
