Bu gün İran Gömrük İdarəsinin rəisi Forud Əsgəri və Azərbaycan Dövlət Gömrük Komitəsinin sədri Şahin Bağırov Biləsuvar sərhəd-keçid məntəqəsində görüş keçiriblər.
Oxu.Az xəbər verir ki, bu barədə "Azad İran" "Telegram" kanalı məlumat yayıb.
Görüş zamanı iki ölkə arasında gömrük əməkdaşlığının genişləndirilməsi, ticarət və tranzitin inkişafı və asanlaşdırılması ilə bağlı məsələlər müzakirə olunub. Tərəflər gömrük xidmətlərinin yeni proqramları barədə razılığa gəlib və görüşün sonunda gömrük əməkdaşlığı haqqında Anlaşma Memorandumu imzalayıblar.
Forud Əsgəri bildirib ki, Astara və Naxçıvan istiqamətlərində tikilməkdə olan körpülərin tamamlanması infrastrukturu möhkəmləndirəcək, yük maşınlarının keçidini asanlaşdıracaq və ticarətin artmasına şərait yaradacaq.
Əsgəri İran prezidentinin Azərbaycanla ticarət mübadiləsinin inkişafına xüsusi diqqət göstərdiyini və müxtəlif görüşlərdə iki ölkə arasında iqtisadi əlaqələrin genişləndirilməsinin vacibliyini vurğuladığını qeyd edib.
Şahin Bağırov isə İran və Azərbaycan arasında ticarətin əhəmiyyətli olduğunu və iki tərəfin də əməkdaşlığın genişləndirilməsinə müsbət yanaşdığını bildirib.
O bu cür görüşlərin problemlərin həlli və maneələrin aradan qaldırılması baxımından əhəmiyyətli olduğunu qeyd edib.
Bağırov problemlərin operativ həlli məqsədilə İran Gömrük İdarəsinin rəhbəri ilə 24 saatlıq onlayn əlaqənin yaradılması imkanını müsbət qarşılayıb.
