"Qiyamət günü radiostansiyası" kimi tanınan "UVB-76" radiostansiyası gün ərzində dördüncü mesajını efirə verib.
Oxu.Az xəbər verir ki, bu barədə onun fəaliyyətini izləyən "UVB-76 logi" "Telegram" kanalı məlumat yayıb. Bakı vaxtı ilə saat 15:06-da növbəti siqnal qeydə alınıb.
Mesajda belə deyilir: "NJTİ 82706 VZYATOÇNİTSA 0709 2918 SEKSOFAT 7132 6500".
Bu gün bundan əvvəl "Qiyamət günü radiosu" üçgünlük sükutu "Doyaropux" sözü ilə pozmuş, ardınca efirdə "gicak" və "monarxist", daha sonra isə "puxokorm" və "qradosbeq" sözləri səsləndirilib.
Qeyd edək ki, "UVB-76" radiostansiyası 1970-ci illərdən etibarən fəaliyyət göstərir. Adətən, efirdə vızıldayan siqnal yayımlandığı üçün insanlar arasında onu "Jujjalka" adlandırırlar. Bununla yanaşı, stansiya tez-tez "Qiyamət günü radiostansiyası" da adlanır. Bəzi mənbələrə görə, "UVB-76" SSRİ dövründə, soyuq müharibənin ən gərgin vaxtında yaradılmış və iddialara əsasən, Rusiya tərəfindən hələ də istifadə olunan sistemin bir hissəsidir.
Sirr dolu "UVB-76" radiostansiyasının mesajları Qərbdə narahatlıq doğurur. Britaniyanın "Express" nəşrinin qeyd etdiyi kimi, stansiyanın aktivliyi, əsasən, beynəlxalq gərginliyin artdığı dövrlərdə müşahidə olunur.
