Bakı-Aktau istiqamətində uçuş həyata keçirən "Gulfstream" tipli təyyarə uğurlu eniş etdikdən sonra təyyarənin yerdə idarəolunması zamanı göyərtəsində texniki nasazlıqla bağlı işarə siqnalı işə düşüb.
Bu barədə Oxu.Az-a AZAL-dan məlumat veriib.
Bildirilib ki, təyyarənin sisteminin pilotlar tərəfindən yenilənməsindən sonra məlum olub ki, təyyarədə heç bir texniki nasazlıq yoxdur və təyyarə uçuşa hazırdır.
Qeyd edək ki, təyyarədə sərnişin olmayıb.
Bakıdan Qazaxıstanın Aktau şəhərində uçuş həyata keçirən təyyarədə problem yaşanıb.
Oxu.Az xəbər verir ki, məlumatı Qazaxıstan Nəqliyyat Nazirliyinin mətbuat xidməti də təsdiq edib.
"Eniş ştat rejimində həyata keçirilib, enişdən sonra təyyarənin burun mexanizmində problem yaranıb. Təyyarədə sərnişin olmayıb" - deyə məlumatda qeyd olunur.
Qazaxıstanın Tengrinews.kz portalı isə məlumat verir ki, söhbət şəxsi "GulfStream" təyyarəsindən gedir.
Xatırladaq ki, dekabrın 25-də AZAL-ın Bakıdan Qroznıya uçan sərnişin təyyarəsi Qazaxıstanın Aktau şəhəri yaxınlığında qəzaya uğrayıb. Təyyarədə 62 sərnişin və 5 ekipaj üzvü olub. Qəza nəticəsində 38 nəfər ölüb, 29 nəfər sağ qalıb.
Qeyd edək ki, qəzaya uğrayan təyyarənin sərnişinlərindən 15 nəfəri Balakən sakini olub, onlardan 9-u həlak olub.
