Banqladeşin cənub-şərq ərazilərində baş verən daşqınlar nəticəsində həyatını itirənlərin sayı 54 nəfərə çatıb.
Oxu.Az xəbər verir ki, bu barədə "Reuters" agentliyi məlumat yayıb.
Bildirilib ki, daha 39 nəfər müxtəlif dərəcəli bədən xəsarətləri alıb. Məlumata görə bu genişmiqyaslı su basmalarına aramsız yağan şiddətli musson yağışları səbəb olub. Çayların məcrasından çıxaraq daşması nəticəsində ölkənin 11 bölgəsi tamamilə su altında qalıb. Həmin ərazilərdə rəsmi olaraq fövqəladə vəziyyət tətbiq edilib. Təhlükəsizlik məqsədilə təxminən 40 min insan yaşadıqları yerlərdən təxliyə olunub. Xilasedici qruplar və könüllülər zərərçəkən əhaliyə davamlı olaraq humanitar yardım çatdırırlar. Buna baxmayaraq, ucqar kəndlərin və rayonların sakinləri təchizatın onlara çox gec və yetərsiz həcmdə gətirilməsindən narazılıq edirlər.
