Norveç və Danimarka alimlərinin apardıqları araşdırmaya əsasən, gündə 100 dəqiqə yerimək beldə xroniki ağrının əmələ gəlmə riskini təxminən 25 faiz azaldır.
Oxu.Az bu barədə CNN telekanalına istinadla xəbər verir.
"Bu mühüm kəşfdir, çünki yerimək sadə, ucuz və əlçatan bir fəaliyyətdir və bel ağrısının şiddətini azaltmaq üçün geniş şəkildə təbliğ edilə bilər", - deyə araşdırmanın aparıcı müəllifi Rayan Haddak bildirib.
Yerimə ilə bel ağrısının profilaktikası arasındakı əlaqəni öyrənmək üçün tədqiqat qrupu 20 və daha yuxarı yaşda olan 11 mindən çox iştirakçının məlumatlarını təhlil ediblər.
2017-2019-cu illər arasında alimlər tədqiqat iştirakçılarından yerişlərini izləmək üçün yeddi gün ərzində akselerometr taxmağı xahiş ediblər. Daha sonra 2021-2023-cü illərdə təkrar müşahidələr aparılıb və iştirakçılardan bel ağrısı yaşayıb-yaşamadıqları soruşulub.
İnsanlar dörd qrupa bölünüblər: gündə 78 dəqiqədən az, 78 dəqiqədən 100 dəqiqəyədək, 101 dəqiqədən 124 dəqiqəyədək və 125 dəqiqədən çox yeriyənlər.
Nəticələr göstərib ki, gündəlik yerimə müddəti artdıqca xroniki bel ağrısı riski azalır. İlkin məlumatlara əsasən, orta və ya sürətli yerişin yavaş yerişdən daha təsirli olduğu müəyyən edilib.
