Belarus Ukrayna sərhədindən təxminən 40 kilometr məsafədə yerləşəcək yeni desant-hücum briqadasının yaradılmasına başlayıb.
Oxu.Az xəbər verir ki, bu barədə Belarus Silahlı Qüvvələrinin xüsusi əməliyyat qüvvələrinin komandanı Aleksandr İlyukeviç Belarus Müdafiə Nazirliyinin "VoenTV" telekanalının efirində bildirib.
Onun sözlərinə görə, yeni birləşmənin formalaşdırılması artıq başlayıb. Hazırda bir batalyon yaradılıb, ilin sonunadək daha bir batalyonun formalaşdırılması planlaşdırılır. Eyni zamanda? döyüş təminatı, artilleriya, hava hücumundan müdafiə və kəşfiyyat bölmələrinin komplektləşdirilməsi davam edir.
Məlumata görə, bölmə Belarusun Qomel şəhəri yaxınlığında yerləşdiriləcək. Bu şəhər Belarus-Ukrayna sərhədindən təxminən 40 kilometr məsafədə yerləşir.
Qeyd edək ki, Ukrayna Silahlı Qüvvələrinin sabiq baş komandanı Aleksandr Sırski iyun ayında Belarus ərazisindən mümkün hücum ehtimalı barədə danışmışdı. Onun sözlərinə görə, Rusiya Prezidenti Vladimir Putin Baş Qərargaha müxtəlif hücum variantlarını, o cümlədən Belarus ərazisindən mümkün əməliyyat ssenarisini nəzərdən keçirməyi tapşırıb.
Ukrayna Prezidenti Vladimir Zelenski də Belarus istiqamətində sərhəd ərazilərində qeyri-adi fəallığın müşahidə edildiyini açıqlamışdı. Onun sözlərinə görə, Ukrayna müdafiə qüvvələri vəziyyəti diqqətlə izləyir və zərurət yaranacağı halda cavab verməyə hazırdır.
