Böyük Britaniya Çaqos adalarını Mavrikiyə verdi

Böyük Britaniya mübahisəli və strateji mövqedə yerləşən Çaqos adaları üzərində suverenliyin Mavrikiyə verilməsi haqqında saziş imzalayıb.

Bu barədə Oxu.Az "Associated Press" agentliyinə istinadla xəbər verir.

Bildirilir ki, bu addım Britaniyanın təhlükəsizliyi üçün həyati əhəmiyyət kəsb edən ABŞ-Böyük Britaniya hərbi bazasının gələcəyini təmin edir.

Sazişə əsasən, Britaniya bazanın ən azı 99 il müddətinə istifadəsinə görə Mavrikiyə hər il 101 milyon funt-sterlinq (təxminən 135,5 milyon ABŞ dolları) ödəyəcək.

17:03

Böyük Britaniya məhkəməsi Çaqos adaları üzərində suverenliyin Böyük Britaniyadan Mavrikiyə ötürülməsini dayandırıb.

Oxu.Az-ın xəbərinə görə, bu barədə "Associated Press" məlumat verib.

Məlumata görə, mayın 22-də keçirilməsi planlaşdırılan onlayn imzalanma mərasimi fövqəladə məhkəmə qərarından sonra ləğv edilib.

Qeyd edək ki, bir neçə ildir üzərində iş gedən müqavilə Hind okeanındakı strateji əhəmiyyətli arxipelaq üzərində nəzarətin Mavrikiyə verilməsini nəzərdə tuturdu.

Böyük Britaniyanın Ali Məhkəməsinin hakimi Çaqos adalarının yerli əhalisinin iki nümayəndəsi tərəfindən qaldırılan iddiaya baxılmasından sonra qadağa qərarı verib. İddiaçılar iddia edirlər ki, müqavilə hazırlanarkən onların fikir və mənafelərinə tamamilə məhəl qoyulmayıb və bu da onların hüquqlarını pozur.

11:52

Böyük Britaniyanın Baş naziri Kir Starmer Mavriki ilə Çaqos arxipelaqının ona təhvil verilməsi üzrə müqavilə imzalayacaq.

Oxu.Az-ın xəbərinə görə, bu barədə Britaniyanın "The Daily Telegraph" qəzeti məlumat verib.

Baş nazir mayın 22-də Mavriki hökumətinin nümayəndələri ilə "virtual imzalanma mərasimində" iştirak edəcək. Ucqar, lakin strateji əhəmiyyətli adalar çoxluğu üzərində suverenlikdən imtina etməklə yanaşı, Böyük Britaniya hərbi bazadan istifadəyə görə Mavrikiyə ümumilikdə təxminən 9 milyard funt sterlinq (12 milyard dollar) ödəyəcək.

Ölkələr arasında razılaşma 2024-cü ilin oktyabrında əldə olunub. Eyni zamanda qərar krallığın müxalif Mühafizəkarlar Partiyası tərəfindən tənqid edilib. Mühafizəkarlar Partiyası hesab edir ki, Mavrikinin Çinlə sıx əlaqələri Dieqo-Qarsiya adasındakı britaniyalı hərbçilərin təhlükəsizliyini təhdid edir.

Qeyd edək ki, Çaqos adaları Hind okeanında 60-dan çox tropik adanın daxil olduğu yeddi atoldan ibarət arxipelaqdır. 1965-ci ildə Mavriki hələ Britaniya koloniyası olduğu zaman Çaqos ölkədən ayrılıb. London onu 3 milyon funt sterlinqə alıb və özünün dənizaşırı ərazisi elan edib.

Mavriki Britaniyanı arxipelaqı qeyri-qanuni müstəmləkə işğalında ittiham edib və bəyan edib ki, onu müstəqillik müqabilində adalara olan hüquqlarından qeyri-qanuni şəkildə imtina etməyə məcbur ediblər.