"Jet2" aviaşirkətinin "Airbus A321" təyyarəsinin pilotlarından biri Böyük Britaniya üzərində uçuş zamanı huşunu itirib və ekipaj fövqəladə vəziyyət elan etmək məcburiyyətində qalıb.
Oxu.Az-ın xəbərinə görə, bu barədə "Mirror" nəşri məlumat verib.
Məlumata görə, Lansarote adasından yola düşən "LS980" reysi Mançester hava limanına planlaşdırılan enişindən təxminən 25 dəqiqə əvvəl Böyük Britaniya istiqamətində adi rejimdə uçuş edib.
"Təyyarə Mançesterə enərkən ekipaj "Squawk 7700" kod sözünü - fövqəladə vəziyyəti göstərən beynəlxalq kodu - ötürüb və dispetçer xidmətinə bildirib ki, pilotlardan biri sağlamlığında yaranan qəfil problem səbəbindən vəzifələrini yerinə yetirməyə davam edə bilmir", - deyə "Mirror" qeyd edib.
Pilot kabinəsinin imkanlarının məhdud olmasına baxmayaraq, qalan pilot tam nəzarəti saxlaya bilib və təhlükəsiz şəkildə enişi davam etdirib.
Nəticədə təyyarə uğurlu şəkildə enib və burada tibb briqadaları huşunu itirmiş pilotu qarşılayıblar. Sərnişinlər adi rejimdə təyyarədən endirilib, ekipaj və sərnişinlər arasında xəsarət alan olmayıb.
"Jet2" aviaşirkəti pilotun vəziyyəti barədə ətraflı məlumat verməyib.
