Böyük Britaniyadakı əczaçılıq müəssisələri çəki itirmək üçün nəzərdə tutulmuş "Wegovy" preparatının həb formasının satışa çıxarılması səbəbindən müraciət edənlərin sayında kəskin artım proqnozlaşdırırlar.
Oxu.Az xəbər verir ki, bu barədə Böyük Britaniyanın "The Independent" nəşri xəbər yayıb.
"Novo Nordisk" şirkəti tərəfindən istehsal olunan bu vasitə Böyük Britaniyanın Dərman və Tibbi Məhsulların Tənzimlənməsi Agentliyi (MHRA) tərəfindən piylənməyə qarşı təsdiqlənmiş GLP-1 sinfinə aid ilk həbdir. Terapiya prosesi 1.5 mq doza ilə başlanılır və ardıcıl olaraq 4 mq, 9 mq və 25 mq-a qədər artırılır. Xəstə növbəti mərhələyə keçməzdən əvvəl hər bir dozanı ən azı bir ay ərzində qəbul etməlidir.
Bazar ertəsindən etibarən tələblərə cavab verən pasiyentlər üçün 1.5 mq və 4 mq olan ilkin dozalar xüsusi apteklərdəki çəkiyə nəzarət proqramları çərçivəsində əlçatan olacaq.
Milli Əczaçılıq Assosiasiyasının (NPA) 310 apteki əhatə edən sorğusunun nəticələrinə əsasən, iştirakçıların 76%-i gələcək aylarda yeni xəstələrin böyük axınını gözləyir. Respondentlərin digər 49%-i isə dərmanın iyun ayında tənzimləyici qurum tərəfindən təsdiq edilməsindən sonra müraciətlərin sayında nəzərəçarpacaq dərəcədə artım olduğunu qeyd edib.
