Kaliforniya ştatının sahil şəhəri olan Nyuport-Biçdə Müstəqillik Gününün qeyd edilməsi zamanı həbs olunanların sayı 400 nəfəri ötüb.
Oxu.Az xəbər verir ki, bu barədə "Los Angeles Times" (LA Times) qəzeti yerli hüquq-mühafizə orqanlarına istinadən məlumat yayıb.
"Nyuport-Biçdəki Müstəqillik Günü şənlikləri xaosa çevrilib və nəticədə yerli hüquq-mühafizə orqanları tərəfindən 400-dən çox şəxs həbs edilib", - deyə məlumatda qeyd olunur.
Bildirilir ki, iyulun 4-ü şənbə günü axşam saatlarında kütləvi iğtişaşlar barədə daxil olan şikayətlərdən sonra polis qüvvələri Nyuport yarımadasına göndərilib. Şahidlər baş verənləri "tam xaos" kimi xarakterizə ediblər.
Şəhər rəhbərliyi qayda pozuntularına qarşı sıfır tolerantlığı ehtiva edən "Nyuportda yox" kampaniyasına başlayıb. Eyni zamanda, kirayəçiləri qanunları pozan mülkiyyətçilərin qısamüddətli icarə icazələrinin ləğv edilməsi qaydası tətbiq olunub.
Nəşrin məlumatına görə, bir polis əməkdaşına partlayıcı maddə atıldıqdan sonra o, həyatı üçün təhlükə yaratmayan xəsarətlər alıb. Saxlanılanların bir çoxunun yetkinlik yaşına çatmayanlar və digər bölgələrdən gələn şəxslər olduğu müəyyənləşib.
