Cənubi Koreyanın sabiq lideri Yun Sok Yol keçən ilin yanvar ayında saxlanılmasına müqavimət göstərdiyinə görə 7 il müddətinə azadlıqdan məhrum edilib.
Oxu.Az bu barədə "KBS" telekanalına istinadən xəbər verir.
Koreya Respublikasının Ali Məhkəməsi sabiq dövlət başçısı barəsindəki qərarı qüvvədə saxlayıb. Eks-prezident dövlət qurumlarının fəaliyyətinə əngəl törətməkdə günahkar bilinərək bu cəzaya məhkum edilib.
Qeyd edək ki, 2025-ci ilin yanvar ayında siyasətçi şəxsi mühafizə xidmətinə onun saxlanmasının qarşısını almağı tapşırıb. Asayiş keşikçiləri onu ancaq ikinci cəhddən sonra nəzarət altına ala biliblər.
Ali Məhkəmə Cənubi Koreyanın keçmiş lideri Yun Sok Yolun işi üzrə ilk hökmünü çıxarıb. O, hərbi vəziyyətin qanunsuz tətbiqi ilə bağlı səkkiz işdə fiqurantdır və buna görə 2025-ci ilin aprelində Konstitusiya Məhkəməsi tərəfindən hakimiyyətdən uzaqlaşdırılıb.
