Çexiyanın şimal-şərqində ehtiyatları 11 ton qiymətləndirilən qızıl yatağı aşkar edilib.
Oxu.Az "Novinky" nəşrinə istinadən xəbər verir ki, yataq Olomouts əyalətind Zlatı-Qorı şəhərinin yaxınlığında yerləşir.
Qızıl ehtiyatlarının həcmi kompleks geoloji tədqiqatlar nəticəsində müəyyən edilib.
Mədən işləri üzrə ixtisaslaşmış dövlət müəssisəsi DIAMO yatağın işlənməsinə başlamağa hazırdır. Nəşrin məlumatına görə, burada ildə 620 kiloqram qızıl hasil edilməsi planlaşdırılır. Müəssisə 10 il ərzində təxminən 6.2 ton qızıl çıxarmağı nəzərdə tutur.
Bu həcmdə qızılın dəyəri təxminən 17.9 milyard çex kronu (870 milyon dollar) qiymətləndirilir.
Nəşr xatırladır ki, Çexiya keçmişdə Avropanın ən böyük qızıl ehtiyatlarına malik ölkələrindən biri olub. Lakin həmin ehtiyatlar orta əsrlərdə tükənib.
