Çinin "Lingkong Tianxing Technology" özəl şirkəti dünyada ilk dəfə 1 300 kilometrə qədər məsafə qət edə bilən "YKJ-1000" hipersəs raketinin kütləvi istehsalına başlayıb.
Oxu.Az xəbər verir ki, bu barədə şirkət nümayəndəsi "South China Morning Post" (SCMP) qəzetinə müsahibəsində məlumat verib.
Tərtibatçı iddia edir ki, "YKJ-1000" saatda 6000-8000 kilometr sürətlə 500 kilometrdən 1300 kilometrə qədər məsafə qət edə bilir. Onun standart yük konteynerinə bənzəyən buraxılış qurğusu həm mobil platformada, həm də suda yerləşdirilə bilər.
"Lingkong Tianxing Technology" nümayəndəsi qeyd edib ki, şirkət aerodinamika, idarəetmə sistemləri, istilik mühafizəsi və hərəkət qurğularını əhatə edən müstəqil texnoloji sikl hazırlayıb. Şirkət məhsulların milli müdafiə sənayesi tələblərinə uyğunluğunu təsdiqləyən sertifikatlar alıb.
Raket uçuş zamanı hədəfləri müstəqil şəkildə müəyyən edə və xüsusilə də hava hücumundan müdafiə sistemlərindən və dəniz zərbə qruplarından yayınmaq qabiliyyətinə malikdir. "Lingkong Tianxing Technology" izah edib ki, kompleks düşmən ərazisinin dərinliklərində strateji əhəmiyyətli hədəflərə sürətli və dəqiq zərbələr endirmək üçün nəzərdə tutulub. "YKJ-1000" həmçinin yüksək həssas sensorları və real vaxt rejimində məlumat ötürmə texnologiyaları sayəsində kəşfiyyat məqsədləri üçün də istifadə edilə bilər.
Qeyd olunur ki, "Lingkong Tianxing Technology" artıq süni intellekt sistemi və sürü qarşılıqlı əlaqə imkanları ilə təchiz olunmuş raket üzərində çalışır.
