Birləşmiş Ştatların Ədliyyə Nazirliyi əfqanıstanlı yaraqlı Məhəmməd Şərifullanı 20 il müddətinə azadlıqdan məhrum edib. Onun İŞİD-in Əfqanıstandakı qanadı hesab olunan "Vilayət Xorasan" terror təşkilatının üzvü olduğu təsdiqlənib.
Oxu.Az xəbər verir ki, bu barədə ABŞ Ədliyyə Departamentinin mətbuat xidməti məlumat yayıb.
Qurumun məlumatına əsasən, Şərifulla 2016-cı ildən 2025-ci ilə qədər 10-dan çox hücumda iştirak edib. O, 2021-ci ildə ABŞ qoşunlarının çıxarılmasından əvvəl Kabil hava limanı yaxınlığında kəşfiyyat işləri aparıb. Bundan sonra ərazidə baş verən partlayış nəticəsində 13 ABŞ hərbçisi və 160-dan çox mülki şəxs həlak olub.
İstintaqın nəticəsinə görə, o, həmçinin 2024-cü ildə "Crocus City Hall"da törədilən terror aktını koordinasiya edərək, hücum edənlərə silahdan istifadə ilə bağlı təlimatlar verib.
Pakistan və Əfqanıstan sərhədində saxlanılan yaraqlı ABŞ-yə aparılıb və orada məhkəmə qarşısında öz günahını etiraf edib.
