Danimarka polisi "Maersk"in ofisindən Qreta Tunberqi və 50-dən çox ekofəalı çıxarıb

Danimarka polisi nəqliyyat və logistika nəhəngi "Maersk"in törəmə şirkəti "Maersk Tanker"in Kopenhagen ofisində keçirilən etiraz aksiyası zamanı 50-dən çox ekoloji fəalı binadan çıxarıb. Etirazçılar arasında tanınmış isveçli ekofəal Qreta Tunberq də olub.

Oxu.Az-ın məlumatına görə, insident barədə "Danmarks Radio" məlumat yayıb.

Aksiya "Yaşıl gənclər" hərəkatı tərəfindən təşkil olunub. Hərəkatın yaydığı press-relizdə bildirilib ki, fəallar "Maersk"in iqlim böhranında roluna diqqət çəkmək məqsədilə şirkətin ofisinə daxil olublar.

Hadisə barədə məlumat səhər saatlarında polisə daxil olub. Əraziyə cəlb olunan asayiş keşikçiləri etirazçılara binanı könüllü tərk etməyi təklif etsələr də, etirazçıların bir hissəsi bu tələbi yerinə yetirməkdən imtina edib.

Nəticədə polis etirazçıları zorla binadan çıxarıb və onlara qarşı binaya qanunsuz daxilolma maddəsi ilə ittiham irəli sürülüb.