“Rusiyalı işğalçılar Zaporojye Atom Elektrik Stansiyasını (AES) partlatmaq və məsuliyyəti Ukraynanın üzərinə atmaqla hədələyirlər - onlar bu vəziyyətdən hərbi məqsədlər üçün istifadə etməyə çalışırlar”.
Bu barədə Ukrayna müdafiə nazirinin müavini Anna Malyar özünün “Telegram” kanalında yazıb.
Onun sözlərinə görə, Rusiyanın Zaporojye AES-lə bağlı vəziyyəti gərginləşdirmək və ərazidə terror aksiyalarına əl atmaq istəməsinin səbəbi müharibənin gedişatını öz xeyrinə çevirmək cəhdidir.
“Hər iki ssenari - həm terror aktları ilə qorxudulma, həm də onların bilavasitə icrası - Rusiya Federasiyasının hərbi məqsədlərə çatması üçün alətdir. Bəs indi nə etməlisiniz? Sakit olun, yalnız rəsmi məlumat mənbələrinə etibar edin və onların tövsiyələrini diqqətə alın”, - deyə Anna Malyar vurğulayıb.
O, həmçinin əlavə edib ki, Ukraynanın dörd regionunda - Dnepropetrovsk, Zaporojye, Xerson və Nikolayev vilayətlərində potensial mənfi nəticələri minimuma endirmək üçün təcili xidmətlər bir neçə gündür ki, təlimlər keçirirlər.
Rusiya prezidentinin mətbuat katibi Dmitri Peskov, öz növbəsində, Ukraynanı təxribatda ittiham edib:
“Zaporojye AES-də vəziyyət kifayət qədər gərgindir, Kiyev tərəfindən fəlakətli nəticələrə səbəb ola biləcək böyük təxribat təhlükəsi var”, - deyə o bildirib.
Kremlin sözçüsü bu təhlükənin qarşısını almaq üçün bütün tədbirlərin görüldüyünü vurğulayıb.
Mənbə: Tsn.ua, Lenta.ru
