Estoniyada Rusiya sərhədləri yaxınlığında NATO-nun əsas təlimləri başlayır

Estoniyanın şimalında və şimal-şərqində, Rusiya ilə sərhədlərin yaxınlığında alyans qoşunlarının hərəkəti və əməkdaşlıqlarının gücləndirilməsi məqsədilə dekabrın 2-də "Pikne" adlı ikihəftəlik böyük NATO təlimi başlayır.

Oxu.Az-ın Interfax.ru-ya istinadən xəbərinə görə, bu barədə respublika müdafiə qüvvələrinin baş qərargahından məlumat verilib.

"Təlimlər zamanı Fransa, Böyük Britaniya və Estoniya qüvvələrinin sürətlə yerləşdirilməsi, həmçinin onların arasında əməkdaşlığın gücləndirilməsi üzərində iş aparılması nəzərdə tutulub. Fransa Silahlı Qüvvələrinin bölmələri Estoniyaya köçürülməsi üçün quru və hava əməliyyatları keçirəcəklər, daha sonra Britaniya və Estoniya bölmələri ilə birlikdə qarşıya qoyulan tapşırıqları yerinə yetirmək üçün təlimlər keçirəcəklər", - deyə Estoniya diviziyasının komandiri və manevrlərə cavabdeh olan general-mayor İndrek Sirel bildirib.

"Pikne" təlimləri NATO-nun "Brilliant Eagle" proqramının bir hissəsidir və NATO ölkələrinin Baltik dənizi regionunda yerləşdirilməsi və əməkdaşlığı imkanlarına fokuslanıb.

Təlimlərdə Estoniya, Latviya, ABŞ, Fransa və Böyük Britaniyadan 2 minə yaxın hərbçi iştirak edəcək. Həmçinin NATO-nun Estoniyada dislokasiya olunmuş çoxmillətli döyüş qrupu qatılacaq ki, buraya Britaniya, Fransa və İslandiyadan olan hərbçilər daxildir.

Təlimlərin birinci həftəsində əsas diqqət Şimal-Şərqi Estoniyanın müxtəlif bölgələrində bölmələrin hərəkəti və qarşılıqlı fəaliyyətin hazırlığına yönəldiləcək, ikinci həftədə isə "Sırqala" poliqonunda ağır hərbi texnika da daxil olmaqla, döyüş atışmaları təşkil olunacaq.

Qeyd edək ki, təlimdən əvvəlki cümə və şənbə günləri NATO-nun Birinci Daimi Hərbi-Dəniz Qrupundan altı gəmi Estoniyaya səfər edib. Onlardan biri təlimlərdə birbaşa iştirak edəcək.

Dekabrın 2-8-də isə NATO ölkələrinin Hərbi Hava Qüvvələri Estoniyanın hava məkanında qırıcı və nəqliyyat təyyarələrində, o cümlədən aşağı hündürlükdə təlim uçuşları həyata keçirəcəklər.